Premiu de la Fundación de la Sidra al llagareru inglés John Thatcher

La Fundación de la Sidra, na que tan presentes los principales Conceyos d'Asturies, les Conseyería de Mediu Rural y Cultura y l'Asociación d'Hosteleros xunto cola Asociación de la Sidra, fizo públicu ayeri'l fallu del so premiu añal col que reconoz la trayectoria de la persona o institución que más fixere pol espoxigue del sector sidreru. El Presidente de la Fundación y Alcalde de Nava, Claudio Escobio, proclamó ganador del certame 2005 al llagareru inglés John Thatcher.

Dotáu con 6.000 euros y una obra del escultor maliayés Pablo Maojo, el premiu de la Fundación de la Sidra, que se vien dando dende l'añu 2001 tien reconocíes iniciatives asturianes como la de la Carpintería Terán pa recuperar toneles de castañu y estranxeres, como ye'l casu de la casa francesa "Ferme de l'Hermitière" productora de mazana, sidra y otros derivaos en Normandía. Nel casu del premiáu 2005, el llagareru inglés John Thatcher, asitiáu en Somerset, el premiu reconoz los 40 años en sector d'un profesional que garró una empresa familiar fundada nel 1904 convertiéndola nuna de les 5 mayores productores de sidra del Reinu Uníu.

Nestes cuatro décades, Thatcher's Cider pasó de facer namás una frasca de sidra a producir 40 distintes, dende monovarietales de mazana hasta sidra de mazanes estremaes mecíes pasando per "delicatessen" como sidra fecho en pipa de ron. Thatcher's cider ye tamién una casa qu'investiga'l desarrollu del frutu, y anguaño ta llevando alantre una finca onde s'esperimenta coles variedaes de pomares y los sistemes de plantación.