Precariedá llaboral en CCOO

El 31 d'avientu Carmen Pérez, que trabayaba pa la CCOO na estaya de Salú Llaboral, vio como'l sindicatu-y retiraba'l contratu por obra que tenía cola entidá dende 2.001 cola promesa de volver a contratala pero ensin da-y fecha. Carmen denuncia que llevaba trabayando de seguío pa CCOO dende 1994, cuando entró pa facer llabor d'ntervención sindical en drogodependencies nel mediu llaboral, pasando ocho años llargos ensin qu'esa estabilidá s'espeyare na rellación contractual col sindicatu, al qu'entró primero con un contratu por obra que duró hasta xunu del 2.001. Tres d'esti contratu, CCOO ofreció-y ún nuevu col que perdíó l'antigüedá que-y daba l'anterior. Asina hasta na nuechevieya del 2.001 en que'l sindicatu decide rematar esti contratu ensin dar esplicaciones a l'afectada sobre les causes de la fin de la rellación llaboral, anque prometiendo-y una posible recolocación de la que nun s'espliquen términos nin plazos. Too ello nun aria d'intervención, como ye la de salú llaboral, que tien una importancia bien grande nel llabor de CCOO y que dende llueu nun funciona a tiempu parcial. La situación ente'l sindicatu y la trabayadora despedida tendrá de resolvese nun actu de conciliación que va facese mañana na Unidá de Mediación Arbitraxe y Conciliación de la Cai Fruela d'Uviéu a la 1 de la tardi. Nesti web especial pues conocer más sobre esti casu, que trai a l'actualidá la situación del colectivu de persones que trabayen pa entidaes sindicales con contratos por obra, que se paguen les más de les vegaes gracies a subvenciones de la Unión Europea. L'afectada sorraya nel escritu qu'unvió a los medios de comunicación la contradicción que suponen casos como el d'ella pa un sindicatu que quier ser defensa contra la precariedá llaboral pero que depués nun cumple colo que diz pa cola xente de casa. Ello ye qu'esti casu vien a salir la mesma selmana en que CCOO ta faciendo actos reivindicativos contra l'alta siniestralidá llaboral, que pal sindicatu vien, ente otres causes, precisamente por culpa de la precariedá llaboral.