‘Prau’ preséntase nel Campu San Francisco

El llibru ilustráu mece dibuxos mui cuidaos y poesía llibre

Esti xueves 31 de marzu a les 19:00 hores va presentase na Biblioteca Lorenzo Rodríguez Castellano, d’Uviéu, el llibru Prau. Nel actu van tar l’autor de los testos, Daniel García Granda, y la ilustradora Ester Sánchez, que ficieron a comuña’l diseñu d’esta obra infantil pero recomendada pa tolos públicos. La editorial Pintar-Pintar asoleyó en 2021 la versión impresa n’asturianu, y en dixital pue comprase en castellanu y en llingua asturiana.

Prau invita a afayanos con una portiella abierta, que da pasu a poemes visuales, que xueguen col soníu y los sentíos de les palabres al traviés d'imáxenes evocadores y metáfores. Los autores tiren de los recuerdos de la neñez y dediquen el llibru “a toles neñes y neños de los pueblos”. Ester Sánchez confiesa que "tolos domingos, mios pas entamaben una escursión" y amesta que «Daniel espresa mui bien el sentíu d’esti llibru cuando diz lo qu’un prau supón pa un asturianu. Esi ‘llugar nel mundu’ ye daqué propio”. Pa Daniel García Granda tamién “un prau apacigua y serena, faite sentite seguru y en casa. Y, al empar, llibre".

La uvieína Ester Sánchez ilustró dellos álbumes infantiles, ente los que figuren Etenko y los patines maraviosos, Colores y más colores, El poema que cayó a la mar y Poemas en la pista, el so últimu trabayu hasta agora. Daniel García Granda, que trabaya de maestru en Mieres, asoleyó llibros como Amorina Motosierra, Versos d’Asturies, Poemes del últimu salvaxe y El Remediu.