Prado: “Cuando veamos manifestaciones contra la impunidá del franquismu, esixendo xusticia pa les víctimes, cambiarán les coses”

Nel 2010, hai agora diez años, una xueza arxentina, María Servini, abrió una investigación sobre los crímenes del franquismu tres una denuncia de familiares de víctimes. Recibió’l nome de la Querella Arxentina y a la mesma foi sumando casos nuevos, ente ellos numberosos asturianos tres la creación de La Comuna d’Asturies, de la que nos fala nesti videu la so vocera Carme Prado.

Echó andar nel 2013, xuniéndose a la Coordinadora estatal d'Apoyu a la Querella Arxentina contra Crímenes del Franquismu (CeAQUA). N’abril del 2014 presentó les 7 primeres denuncies, 3 por desapaiciones forciaes ente los años 1936 y 1939, y 4 por tortures na década de los 60 y 70, a les que se foron xuntando col pasu los años “munches más, individuales y coleutives, hasta llegar a los más de 400 casos que tenemos agora mesmo”.

Al ser “consciente de que la esixencia de xusticia pa les victimes del franquismu tien que facese equí, nel Estáu español”, presentaron tamién querelles “poles tortures de dellos policíes qu’entovía tán vivos”. N’Asturies foron 3 contra Pascual Honrado de la Fuente, “Pascualón como lu conocíen nes cuenques”, que tres el refugu de los tribunales españoles la Comuna d’Asturies va llevar a instancies internacionales como’l Comité de Derechos Humanos de Naciones Xuníes.

Prado esplica tamién nel videu detalles del trabayu de sensibilización desendolcáu sobre “qué significó’l franquismu y que significa’l franquismu güei, porque esto nun ye una cosa del pasáu, sinón tamién de presente y futuru”; fala del documental ‘El silencio de otros’, “que cuenta’l desarrollu de la Querella dende que se presentó nel 2010 al 2018”; y esplica ente otres munches iniciatives que tien en marcha La Comuna d’Asturies. Ente elles rescamplen les de movilización nes cais, porque “cuando veamos manifestaciones contra la impunidá del franquismu, esixendo xusticia pa les víctimes, nesti país cambiarán les coses”, encamienta.