PP y Izquierda Xunida califiquen el portalgu del Güerna de "engañu, estafa y atracu"

El presidente del PP n'Asturies, Ovidio Sánchez, acusó al presidente de'España, José Luis Rodríguez Zapatero, de "engañar y mentir" a los asturianos por incumplir el so compromisu de suprimir el portalgu de l'autopista del Val.le Güerna na campaña del 2004. Pela so parte, el diputáu d'Izquierda Xunida-Bloque por Asturies-Los Verdes, Aurelio Martín, calificó'l caltenimientu de la tasa de "estafa y atracu", polos mesmos motivos.

Sánchez, nuna rueda prensa ofrecida na Xunta Xeneral del Principáu, dixo que de confirmase que l'Exeuctivu aprueba mañana una rebaxa pa los conductores que transiten habitualmente pol peaxe, con una especie de tarxeta que demuestre'l númberu de viaxes, va suponer la "demostración" de la "mentira" de los socialistes hacia los asturianos, usuarios d'esa vía qu'une'l Principáu y Llión.
El presidente 'popular' recordó que Zapatero "descolgóse" en febreru del 2004 cola atractiva ufierta de quitar el peaxe y de conducir l'autovía del Cantábricu. "Nun cumplió nada", señaló. Tamién se refirió a unes declaraciones del diputáu del PSOE por Asturies, Álvaro Cuesta, quien en marzu tamién dixo que la supresión del peaxe diba ser una de les primeres midíes del Gobiernu socialista.

De fechu, el dirixente popular dixo güei que la política del actual Gobiernu perxudica a los asturianos, dao que sí que se suprimieron peaxes n'otres rexones como Cataluña o Galicia. "Zapatero trata a los asturianos como españoles de peor condición", dixo.

Amás, Sánchez esplicó que los ciudadanos, lloñe de ver la supresión del portalgu del Güerna na llexislatura qu'acaba, tien de soportar un aumentu del mesmu del diez por cientu nesti periodu.
Frente a la manera de facer política de los socialistes, Sánchez reivindicó les formes del PP y recordó que'l so partíu "cumple lo que diz". Punxo como exemplu la construcción del tramu Onzonilla-Benavente (Llión-Zamora) ensin portalgu, "énte los planes del PSOE de facelu con portalgu".


El delegáu del Gobiernu n'Asturies, Antonio Trevín, destacare primero d'estes declaraciones énte medios de comunicación, les dificultaes que topó l'Executivu central pa reducir el portalgu del Güerna, anque matizó que ye un compromisu que se ta cumpliendo.

"Nun hai qu'olvidar", dixo Trevín, que'l Gobiernu del PP decidió una ampliación del peaxe de 29 años y la privatización de la empresa, "lo que fizo mui difícil la intervención, pero'l compromisu yera baxalo paulatinamente, y asina se fizo", dixo en referencia al ámbitu del tresporte profesional, que cuenta con una rebaxa del 30 por cientu.

"Nel so momentu esti Gobiernu comprometióse a la rebaxa nel Güerna, y nesta llexislatura rebaxóse per primer vez", reseñó'l delegáu del Gobiernu nel Principáu.