PP y IX dicen que les cuentes de Presidencia, Xusticia y Igualdá nun aporten "nada nuevo"

La conseyera de Presidencia, Xusticia y Igualdá, María José Ramos, aseguró ayeri que'l presupuestu de la so conseyería ye "inversor dafechu" y destacó del mesmu l'incrementu del 125% n'inversiones n'infraestructures". Pela so parte IX calificó les cuentes d'esta conseyería de "frustración, que significa vuelta p'atrás y contién importantes señales de fraude", mientres que'l PP aseguró que la comparecencia de Ramos nun ofrez "nada nuevo" porque nun se prevé nada nuevo nel proyectu presupuestariu.

La conseyera de Presidencia, Xusticia y Igualdá, María José Ramos, foi la encargada d'abrir güei'l turnu de comparecencies de los miembros del Executivu Autonómicu pa dar cuenta na Xunta de les partíes de les sos respectives conseyeríes nel proyectu presupuestariu pal 2008.

El grupu parlamentariu del PP, al traviés de la so diputada, Cristina Coto de la Mata, manifestó que la comparencencia de Ramos nun ofrez "nada nuevu" porque nun se prevé nada nuevu nes materies de la conseyería. Tampoco los 'populares' comparten les cuentes referíes a Igualdá y consideren que'l Gobiernu nun fai "bastantes esfuercios na llucha escontra la violencia de xéneru y les campañes preventives".

El PP solicitó tamién un mayor esfuerciu en materia d'axuste de la vida llaboral a la familiar, porque recordó que'l Principáu "ta a la cola nesta materia", dalgo paceíu a lo que pasa cola creación d'emplegu femenín na rexón y cola resquiebra salarial ente homes y muyeres.

El diputáu d'IX-BA-LV, Javier García Valledor, afirmó que'l so grupu considera que'l proyectu presentáu desmonta la gran mentira del señor d'Areces en cuantes que lo que se-y busca ye l'alcuerdu con IX-BA-LV. "Ye un proyectu que frustra, que significa una vuelta p'atrás y contién importantes señales de fraude", dixo.

Valledor dixo que lo que medra un 85,66% en personal eventual de gabinete respecto al 2007, asina como un 205% en gastos xenerales -gastos de conceyos, llocomoción, etc--, dalgo qu'a IX "nun-y presta". Añadió que nun consideren necesaries dos direcciones xenerales sinón qu'aspiren a un proyectu integral de seguridá pública.

Criticó amás la "puesta en riesgu" de proyectu en marcha nel ámbitu de protección civil y seguridá pública polos pocos incrementos presupuestarios en diches materies. No qu'a la política de cooperación, a xuiciu de Valledor les cuentes suponen un "frenazu" a les mesmes y señaló que se da "un gran frenazu" a les ayudes a inmigrantes. "Evidentemente'l recorte de les polítiques sociales nótase non sólo pa los asturianos que viven n'Asturies, sinón tamién pa los que viven fuera", dixo Valledor.

María José Ramos recordó que nel 2007 la celebración de les elecciones llocales y autonómiques fizo que nos presupuestos d'esti añu recoyera una partida de 2,7 millones sólo pa esi asuntu. Asina, si se resten esa cantidá, l'aumentu "real" diba ser del 9,85% y non el 6,8% aparente.

Los presupuestos de Presidencia, Xusticia y Igualdá presenten pal 2008 una cifra global de 104.246.916 euros, un 6,81%. Por árees, destínense 30,5 millones a Xusticia, 5,3 a Igualdá, 14,1 a Interior, 30,1 a Seguridá Pública, 3,6 a Emigración, 14,1 a Cooperación al Desarrollu, 1,9 a relaciones cola Xunta Xeneral del Principáu y 4,2 pa Servicios Xenerales.

En materia d'Igualdá, señaló que'l presupuestu pal Institutu Asturianu de la Muyer sube a 5,3 milones, dalgo que nun supón un cambiu cola cifra del añu pasáu, pero utilizando'l mesmu argumentu, recordó que nos años 2006 y 2007, les cuentes recoyíen l'entamu de la Casa Malva de Xixón, polo que sí qu'hai un incrementu.

Polo que se refier a Xusticia, comentó que'l presupuestu del 2008 va ser de 30,6 millones, lo que representa un incrementu del 36,35%. Comentó que la principal razón ye l'entamu de nueves infraestructures per tol territoriu, con una cantidá de 8,6 millones, lo que suponen un incrementu del 125% y que van dar llugar a la materialización de proyectos como'l del Institutu de Medicina Llegal (un millón pal 2008), el Palaciu de Xusticia de Xixón (un millón pa la llicitación del proyectu), les obres de les nueves sedes xudiciales de Villaviciosa, L.luarca y Pravia (1,8 millones) y la redacción de diversos proyectos (390.782 euros).

El presupuestu de Cooperación al Desarrollu, pela so parte, garantiza'l caltenimientu del 0,7% de los recursos propios del Principáu, mientres que les tresferencies a 112 y Bomberos d'Asturies pasen de 27,8 a 29 millones d'euros.