PP y IX-BA-LV presenten enmienda a la totalidá del Presupuestu 2008 del executivu

Los grupos parlamentarios del Partíu Popular y d'Izquierda Xunida-Bloque por Asturies-Los Verdes na Xunta Xeneral anunciaron la presentación d'enmiendes a la totalidá del proyectu presupuestariu presentáu pol Executivu autonómicu pal añu 2008.

Nel casu del PP, el so portavoz Ovidio Sánchez señaló que'l Principáu ye una comunidá "que nun evoluciona" y rexistra una de les tases d'actividá más baxes d'España, con diez puntos perbaxo de la media nacional y "nun crez demográficamente" . "Los mozos van buscar trabayu fuera y nun ye un llugar atractivu pa los inmigrantes", destacó, apuntando como una de les principales causes l'alta presión fiscal.
"Ye necesariu un presupuestu que cambie les tendencies y ofreza más oportunidaes", dixo Ovidio Sánchez, motivu pol cual, el so grupu va pidir la devolución del proyectu al Gobiernu pa que presente ante la cámara una propuesta "meyor" que "respuenda a les necesidaes de los asturianos".

En cuantes a la coincidencia de que los dos grupos de la oposición, PP y IX-BA-LV vayan a presentar la enmienda, Sánchez dixo que "caún defiende los sos argumentos pa ellos al non haber un testu alterntivu".
Según indicaron los 'populares', dende'l 2002 incrementóse la presión fiscal nun 17 por cientu, lo que supón una subida de más d'un puntu sobre'l PIB del Princiáu, al pasar d'un 6,95 por cientu hai cinco años, al 8,10 por cientu previstu pal 2008. Nesti sen, Alejandra Cuétara insistió en que "hai más presión fiscal pero la población nun medra, polo que l'incrementu asúmenlu los mesmos".

Amás, Sánchez afirmó que, a pesar de que'l Principáu recauda más ente impuestos directos, indirectos y tases, continúen los retrasos nes llistes d'espera sanitaries; existe un "gran fracasu na educación anque tenten de maquillalu"; nun hai una apuesta decidida pola Universidá; el suelu industrial ye escasu; y ye una comunidá poco atractiva pa les empreses con poca ufierta llaboral.
Pela so parte, Cuétara reseñó tamién qu'anque aumenta la presión fiscal, el Gobiernu nun ye quién a realizar les inversiones. Asina apuntó qu'en tolos exercicios de la pasada llexislatura les inversiones finales supunxeron un porcentaxe menor del previstu nos presupuestos.
"Esti nun ye'l camín", dixo Sánchez y añadió qu'esti modelu de presupuestos "sume a Asturies nel pozu". Propón, igual que fai'l PP en Madrid, Valencia o Murcia, baxar la presión fiscal pa crear oportunidaes empresariales y recuperar le tases d'emplegu.

Pela so parte, el Grupu parlamentariu d'Izquierda Xunida-Bloque por Asturies-Los Verdes presentó güei na Xunta Xeneral una enmienda a la totalidá del proyectu de presupuestos presentáu pol Gobiernu autonómicu. El diputáu d'IX-BA-LV, Jesús Iglesias, indicó que "los conteníos del proyectu presentáu suponen un presupuestu que tien de plantegar una negociación que permita otres cuentes distintes a éstes dende la izquierda y respondiendo a les necesidaes d'Asturies".
Iglesias anunció la presentación de la enmienda a la totalidá en rueda prensa, acompañáu de los cabezaleros del Bloque por Asturies, Rafael Palacios, y de Los Verdes, Ignacio González. Los tres coincidieron en culpar al Executivu de la imposibilidá de negociar los presupuestos y indicaron qu'ante unes cuentes que nun-yos presten prefieren optar pola prolongación de les del añu pasáu.


Entrugáu pola intención d'IX-BA-LV d'apoyar la enmienda a la totalidá que va presentar el PP, Iglesias manifestó que desconoz les intenciones de los 'populares' y añadió que "de toes maneres enantes de pronunciase tien de conocela".
"Lo que cabe ye retirar esti proyectu y plantegar otru, porque pue haber capacidá d'ellaborar unos nuevos presupuestos partiendo de cero", dixo Iglesias, qu'afirmó que "lo que nun se podía evitar acabó ocurriendo, porque quienes teníen la responsabilidá de facelu nun ficieron el más mínimu esfuerciu por negociar les cuentes".
El diputáu d'IX-BA-LV afirmó que'l Gobiernu "tratólos igual qu'al PP" y aseguró que lo único que ficieron pa tentar de negociar foi "convidalos a un café". Amás afirmó que na Cámara taben con un presupuestu que "da marcha p'atrás a tol conteníu social llográu nel pasáu".
Dixo qu'Asturies necesita otru Presupuestu y que'l mesmu ye posible porque l'estáu fiancieru de la rexón ye "saludable" y la solvencia del Principáu "ye meyor que nunca".
Iglesias volvió a criticar el, al so xuiciu, "escasu conteníu social de les cuentes" y tachó como "un insultu a la coalición" los presupuestos que "traten peor aquello que foi propiu d'IX-BA-LV". Nesti sen volvió referise a les escases partíes destinaes a l'atención a la Dependencia, el Plan de Vivienda, el Salariu Social o'l Plan de l'Agricultura Ecolóxica.
El diputáu d'IX-BA-LV afirmó amás que nin los conceyos nin los axentes sociales debe preocupase porque se cuente con una prolongación presupuetaria porque'l so grupu parlamentariu va dar el so apoyu a los proyetos que los beneficien.