PP-Foro gana les estatales n'Asturies con un 30 por cientu de los votos

|

Unidad Popular, la plataforma na que participa IX y IAS, nun algama representación. Los populares sumen 3 escaños, por 2 de PSOE y Podemos, y 1 de Ciudadanos. A nivel estatal gana'l PP, pero tendrá dificultaes pa gobernar.

Col 99,91 por cientu escrutáu PP y Foro perderíen 19 puntos en comparanza col 2011, cuando participaron per separtao, pero ganaríen con amplitú les Estatales n'Asturies al sumar un 30,14 por cientu de los votos, sumando 3 escaños. Nes anteriores el PP alcanzara 3 y Foro 1, polo que la formación asturiana caltendría'l so escañu al dir como númberu dos de la llista de la coalición Isidro Martínez Oblanca.

La segunda fuercia más votada ye'l PSOE, col 23,28 por cientu de los votos, mentes que Podemos sumaría unos resultaos espectaculares al algamar el 21,34 por cientu de los votos. Dambes formaciones sumaríen dos escaños. Mientres, Ciudadanos quedaría con un 13,55 por cientu y lleva ún escañu.

La gran sorpresa de la xornada ye'l resultáu de 'Unidad Popular: Izquierda Unida, Unidad Popular en Común, Izquierda Asturiana (IU-UPeC-IAS)', que nun va caltener el diputáu que tenía IX. Esta plataforma eleutoral alcanza un 8,46 por cientu de los votos.

La participación nestes eleiciones foi del 71,21 por cientu, siete puntos más alta que nel 2011 (64,57 por cientu). El 0,82 por cientu de los votos foron nulos y el 0,90 por cientu optó pol votu en blancu.

D'esta forma los diputaos nel Congresu por Asturies son los siguientes: Susana López Ares y José Ramón García Cañal (PP); Isidro Manuel Martínez Oblanca (Foro); Adriana Lastra y Antonio Trevín (PSOE); Sofía Fernández Castañón y Segundo González García (Podemos); y Ignacio Prendes (Ciudadanos).

Pal Senáu, el PP algama 3 representantes (Ovidio Sánchez, Mario Arias y Rosa María Domínguez de Posada) y el PSOE, 1 (Vicente Álvarez Áreces). Éstos súmense a los dos representantes de la Xunta Xeneral na Cámara Alta, el popular Fernando Goñi y la socialista María Luisa Carcedo.

Difícil gobernabilidá

Los resultaos a nivel estatal dan el trunfu al PP, formación que va tener qu'enfrentase a una situación de difícil gobernabilidá. Los populares, col 99,69 escrutáu, sumen 123 diputaos, 63 menos qu'hai cuatro años, cuando ganaron por mayoría absoluta. Asina'l PP pasa de sumar un 44,63 por cientu de los votos a un 28,71 por cientu. La segunda fuercia ye'l PSOE, con 90 escaños y un 22,02 por cientu de los votos.

Podemos saca mientres 42 escaños, a los qu'hai que sumar los que lleva nes coaliciones que fixo en dellos territorios con otros partíos: En Comú Podem (Catalunya), 12; Compromís-Podemos. És el moment (Comunitat Valencia), 9; y En Marea (Galicia), 6. La suma total ye de 69 escaños.

Ciudadanos queda en cuarta posición con 40 parllamentarios (13,93 por cientu). Tamién algamen representación ERC-Catalunya Sí (9), Democràcia i Llibertat (8), EAJ-PNV (6), Unidad Popular (2), EH Bildu (2) y Coalición Canaria-PNC (1). Queden fuera del Congresu UPyD, BNG, Geroa Bai y Unió Democrática de Catalunya, que se presentaba en solitariu.

Na so intervención tres conocese los resultaos, Mariano Rajoy afirmó que "intentaré facer un gobiernu estable", anque almitió que "nun será fácil". Nos díes próximes comenzarán les conversaciones ente les distintes formaciones pal entamu de posibles pautos, con un resultáu que se presenta imprevisible.

Contador Estadistiques