PP, Ciudadanos y VOX voten contra la oficialidá nel Plenu d'Uviéu

El PSOE y Somos posicionáronse contra de la moción. Refugóse una enmienda socialista que pidía'l cumplimientu de la Llei d'Usu, que'l gobiernu municipal diz defender.

El PP sigue cola intención de llevar mociones a los conceyos asturianos pa refugar la cooficialidá del asturianu, de competencia nacional. Güei tocó'l turnu a Uviéu, onde sí pudo algamar apoyos pa sacar alantre la proposición, nesti casu conxunta con Ciudadanos.

Los dos partíos nel gobiernu, con 9 y 5 ediles, de manera respeutiva, sumaron el sofitu de VOX pa algamar 16 votos favoratibles polos 11 en contra qu'acumulen el PSOE (8) y Somos (3). Los socialistes presentaran una enmienda de modificación na que reclamaben el cumplimientu de la Llei d'Usu mientres nun se modifique l'estatus llegal del idioma nel Estatutu d'Autonomía, que les trés formaciones de la derecha refugaron.

Magar la defensa que faen y fixo, por exemplu el PP nel Plenu, de la Llei d'Usu, lo cierto ye qu'ésta s'incumple de manera sistemática nel Conceyu. Un bon exemplu ye la desapaición del topónimu tradicional, oficial xunto 'Oviedo' na forma billingüe Oviedo/Uviéu, en tola actividá municipal nesta llexislatura.

Otra manera, PP, Ciudadanos y VOX sumaron tamién los sos votos pa torgar una moción presentada polos partíos d'izquierda contra les agresiones homófobes, como l'asocedida esta fin de selmana nun chigre nocherniegu de la ciudá.