Porrúa, pueblu exemplar d'Asturies

La 16 edición del premiu al Pueblu Exemplar d'Asturies que concede la Fundación Príncipe d'Asturies foi pal pueblu llaniscu de Porrúa. El xuráu llamó l'atención sobre l'actividá de l'asociación Cultural porruana Llacín, que xestiona'l Muséu Etnográficu y la banda de gaites del pueblu.

L'acta del xuráu, presidíu pol xerente de Reny Picot Francisco Rodríguez y nel que taben tamién l'economista Jesús Arango, el director xeneral de Recursos Naturales y Protección Ambiental Cristino Ruano o la cronista oficial d'Uviéu Carmen Ruiz-Tilve fai un resume de la historia de Porrúa y los sos aspectos sociales y económicos más identitarios. Asina, nel informe del xuráu diz que la primer noticia que se tien de la esistencia de Porrúa son d'últimos del sieglu XI anque nun va ser hasta 1385 qu'entre a ser parroquia de Llanes, tando la economía tradicional del pueblu marcada pola ganadería en réxime de treshumancia, anque col tiempu la cabra y la oveya tradicionales dexáron-y'l sitiu a la vaca. La emigración a les amériques d'últimos del XIX y primeros del XX dexó la so marca tamién en Porrúa, que tien un bon catálogu de cases particulares y arquitectura pública indianes ente'l que lamen l'atención la escuela, la Casa Conceyu, el casinu, la bolera o la ilesia y el cementeriu.

L'acta del xuráu tamién sorraya la importancia de l'asociación "Llacín", creada nel 1994 col oxetivu de desarrollar actividaes culturales y sociales nos edificios y finques cedíes pola familia Haces Sordo, emigrantes porruanos en México. Parte d'estes actividaes son la creación del Muséu Etnográficu del Oriente d'Asturies, la edición añal del Mercáu Astur y la creación de la Escuela de Música Tradicional y la Banda de Gaites Llacín. L'Asociación Llacín participa tamién nel programa Pueblu Cultural d'Europa, una iniciativa na que s'enxerten once pueblos de distintos países europeos. Nel añu 2008 Porrúa va ser la sede de les actividaes d'esta rede.

El premiu que-yos concedió ayeri la Fundación Príncipe d'Asturies consiste en venticinco mil euros, de los que'l Gobiernu asturianu pon la mitada y que suelen entregase nun actu solemne qu'incluye la visita del heriede de la corona española al pueblu.