"Por ahí", aire fresco pa la gaita y el tambor

Tolos aficionaos a la música asturiana conocen perbien los discos de gaita y tambor. Poro, d'esti tipu trabayos podemos tener la idea equivocada que yá ta too fecho y grabao, el discu "Por ahí" d'Iván Rionda y Ricardo Moreno "El Colchoneru" desmiéntelo dafechu.

Iván Rionda (gaita) y Ricardo Moreno "El Colchoneru" (tambor) son dos músicos que tol qu'ande, d'una manera o d'otra, enguedeyáu cola música tradicional conoz. 15 años tocando xuntos en milenta sitios y d'un cientu maneres faen que seyan actores habituales no que llamamos música tradicional asturiana. Tantos años xuntos llevólos a una conclusión evidente, y polo que se pol resultáu necesaria, grabar un discu, trabayu discográficu que presentaron esti añu col nome de "Por ahí".

Nesti tipu de grabaciones podemos tener el prexuiciu o la galbana como oyentes de pensar que vamos sentir lo mesmu que n'otros, muñeires, xotes y demás pieces que formen parte del repertoriu básicu y habitual de les pareyes de gaita y tambor. Pero Rionda y Moreno yeren mui conscientes d'ello, y precisamente, gracies a la so esperiencia y gana de restolar na música asturiana, alcontrámonos con que de lo vieyo suena lo nuevo.

"Por ahí" llevanos al traviés del son tradicional per 12 temes prácticamente non rexistraos y poco conocíos de la nuestra música. Pa esto contaron cola collaboración d'un de los más constantes y admirables compiladores de música tradicional asturiana, Javier el d'Arroes, al que la pareya tien el bon gustu de dedica-y el discu. Asina, topamos una versión del “Pasodoble de Dionisio” arreglada por David Varela pa la formación “El Koku la Manzana”, cinco temes de gaita y tambor (alborada, xota, muñeira, xiringüelu y pasodoble), dos tonaes asturianes interpretaes poles  voces de Lorena Corripio, Ismael Tomás Montes y Celestino Rozada, el Fandango de Pendueles cola collaboración de la “Asociación de Folclore Azabache” y  “Serafina”, un pasodoble arregláu pa pianu, vigulín, baxu, gaita y tambor pola mayestra del Conservatoriu de Xixón Adriana Cristina Garcia.

Mención aparte merecen dos cortes que consisten en dos solos de tambor de Serafín Álvarez “el Redoblante de Quintes”, interpretaos por Ricardo Moreno, y que vienen a cubrir otru de los oxetivos del discu, que como ellos mesmo reconocen, ye'l de rexistrar los toques del propiu Moreno.

Con tolo dicho, con tola bayura que presenta'l discu, podemos escaecenos de la primera idea de la que falabamos a lo primero, otru discu más de gaita y tambor ensin mayor novedá. Dende la música tradicional Iván Rionda y Ricardo Moreno, cola collaboración d'unos cuantos collacios, recuérdanos la esencia y lo prestoso de la gaita y el tambor, pero sobre too, la bayura temes que queden tovía por tocar, sentir y esfrutar na música asturiana. "Por ahí" cuerre de lo fácil y trillao, y da un toque d'atención pa que les y los músicos asturianos sigan buscando caminos nuevos, bien seya dende lo más tradicional o dende lo más folk.