Pontón asoleya la novela xuvenil 'La moza d'ayeri'

Con esta historia editada por Trabe trata d'averar a la mocedá'l pasáu recién del Estáu.

María Luz Pontón torna a espublizar una obra n'asturianu. Ye 'La moza d'ayeri', una novela pal públicu xuvenil que se desendolca en dos tiempos distintos: d’un llau nos años cincuenta del sieglu XX, metanes la dictadura franquista, cuando Nora, la madre de Colette, la protagonista, yera moza, y d’otru nos años de la Transición llueu de la muerte del dictador.

"Centrada na vida de les muyeres y les torgues que la sociedá de la época-yos ponía pa tener una vida plena y llibre, Colette, que ta empezando la vida y mira’l mundu con otros güeyos, ha reblagar perriba dellos problemes familiares que-y van cambiar la vida y van facela madurar", apunten dende la editorial. El llibru, númberu 10 de la coleición 'Pesllera', va presentase esta tarde a les 19 hores n'Uviéu, nel Club Prensa Asturiana, nun actu nel que Pontón va tar acompañada por Esther Prieto, copropietaria de Trabe; Luz M. Seijo, secretaria d'Educación y Formación Profesional de la CEF-PSOE y covocera d'Educación nel Congresu; y Ricardo Fernández Rodríguez, abogáu y collaborador del memorialismu democráticu.