Pons escusa’l videoxuegu xenófobu del PP catalán

El vicesecretariu de Comunicación del PP, Esteban González Pons, aseguró esti miércoles que'l videoxuegu 'Alicia Croft', creáu poles Nueves Generaciones 'populares', foi un "error" de la empresa y asegura que la idea inicial yera "buena".

Defendió que se pretendía que la presidenta del PP de Cataluña, Alicia Sánchez Camacho, "s'enfrentare a los problemes" de la Comunidá y "non" a la inmigración illegal.
  
El xuegu representa a la líder 'popular' al llombu d'una gaviota llamada 'Pepe' que llanza idees en forma de bombilla contra tolos inconvenientes que topa pel camín, frenando la inmigración illegal, tresformando un zeppelin con una 'estelada' nun globu cola bandera catalana y española, y abriendo unos llabios zarraos con cremallera pa dar llugar a una llingua cola 'senyera' y la bandera española.
  
"Ye un error porque la idea yera que Sánchez Camacho s'enfrentare a los problemes de Cataluña como son el paru, la fiebre independentista y la situación de munches persones sin empléu y sin posibilidaes de salir alantre, asina como a les mafies que los traxeron y caltienen", esplicó González Pons nuna entrevista a la Cadena Ser recoyida por Europa Press.

Amás, aseguró qu'esta idea "nun ye agresiva" y que la realización que fizo la empresa encargada del videoxuegu "nun foi tan bona" como la intención del PP.
  
Campaña contra la inmigración
Nesta llinia, recordó que la inmigración va ser ún de les temes fundamentales nes campañes electorales del PP y mostróse partidariu de repatriar a les persones que, na actual "crisis", "nun tienen n'España'l colchón familiar", yá acabaron toles "sos prestaciones" y "nun tienen medios pa salir alantre".
  
Unos ciudadanos que, al so xuiciu, ye recomendable que vuelvan al so llugar d'orixe, "onde tienen garantizada la sobreviviencia", pa qu'asina dexen que vengan "otros" que puean tener posibilidaes d'empléu. "Nós creemos que la inmigración, como tantes otres coses, tien que ser sostenible", remarcó'l dirixente 'popular'.