Políticos, escolinos y representantes de la cultura lleeron na Xunta 27 testos n’asturianu y gallego-asturiano

Esti martes celebróse na Xunta Xeneral l’actu institucional con motivu de la Selmana de les Lletres Asturianes. Mediu centenar de políticos, escolinos y representantes de la cultura del país participaron nuna sesión na que se lleeron 27 testos n’asturianu y gallego-asturiano de dellos autores, na so mayor parte muyeres.

Los alumnos de Primaria de los colexos Germán Fernández Ramos, d’Uviéu, y Carlos Bousoño, de Bual, foron los convidaos nesta ocasión, encargándose d’acompañar na Mesa de la Cámara al so presidente, Pedro José Sanjurjo, y la vicepresidenta primera, María José Miranda Fernández, los escolinos Francisco Javier Díaz Hincapié, del centru uvieín, y Lara Iglesias, del bualés. Xunto a ellos, Genaro Alonso, conseyeru d’Eduación y Cultura, y Ana María Cano, presidenta de l’Academia de la Llingua Asturiana.

Sanjurjo, naturales d’Abres, encargóse d'iniciar la sesión con unes pallabres en gallego-asturiano, pa depués emplegar el castellanu na mayor parte del mesmu. Nesta ocasión abrió'l turnu de llectures con un testu propiu, de nome ‘O níu da reicha’.

En total foron 27 los testos, la mayor parte obra de muyeres, que se lleeron nel Parllamentu asturianau, cola participación de les conseyeres María Jesús Álvarez González y Pilar Varela, los voceros Emilio León (Podemos) y Nicanor García Fernández (Ciudadanos), y representantes de tolos grupos políticos.

Calcando nesti enllaz, pue ver tola sesión en videu.