Política Llingüística convoca’l XIII Premiu Camaretá y el V Nel Amaro

Una selmana depués de la convocatoria de los cinco Premios Lliterarios clásicos, la Conseyería de Cultura, Política Llingüística y Turismu fai lo propio colos dos d’artes escéniques. Son el XIII Premiu Camaretá al Meyor Cantar y el V Premiu y Festival Nel Amaro de Teatru Profesional en Llingua Asturiana o Gallego-asturiano.

El musical va valorar el meyor tema editáu y difundíu en tol 2020 –l’anterior edición, ganada por ‘Rambalín’ de Rodrigo Cuevas, tamién incluyía los seis primeros meses d’esi añu amás de tol 2019– y hasta la fecha de la convocatoria d’esta edición. El gallardón caltién la recompensa de 6.000 euros y el mesmu formatu que siempre, col 21 de mayu como fecha tope pa presentar los cantares aspirantes pasar a la gala final y resultar escoyíu como meyor cantar.

Esti mesmu día tamién fina’l plazu pa presentar obres de teatru pal Nel Amaro, nel que tampoco nun hai cambios nes condiciones pa participar nin na remuneración pal ganador, de 6.000 euros. ‘El viaxe de Covaletti’, d’Higiénico Papel Teatro, resultó ganador l’añu pasáu, segunda ocasión na qu’esta compañía llevaba’l gallardón tres facelo na segunda edición, nel 2018, con‘Hansel y Gretel’.

Depués de la convocatoria de los cinco Premios Lliterarios clásicos, namái quedaríen por cumplir con esti trámite los dos de creación nueva, programaos pal segundu semestre del añu. Son el Premiu Florina Alías a la meyor traducción al asturianu y el Premiu Enriqueta González Rubín de narrativa p’autores moces y mozos, destináu a menores de 30 años.