Polémica polos cursos de l'Academia

Nos foros d'Asturies.com hai de va unos díes p'acá una polémica sobre la conveniencia de que l'Academia de la Llingua Asturiana lleve esti veranu los sos cursos de formación al conceyu d'Ibias, na llende con Galicia. Dende dellos sectores del galleguismu cultural, camiéntase qu'esti allugamientu supón facer de menos a los falantes de la zona. L'Academia de la Llingua Asturiana espublizó esti comunicáu que reproducimos enteru amosando la so opinión sobre estes crítiques. N'opinión de la institución llingüística, el fechu de que se faigan los cursos n'Ibias nun supón un despreciu a naide, sinon que respuende, ente otres coses, a la petición de della xente de que los cursos, nos que tamién se pon clase de Gallego-Asturianu, se llevaren dalgún añu pa la so zona, cuando siempres teníen que treslladase ellos a otros conceyos. L'ALLA remembra tamién que ye una institución con potestá pa poner cursos en cualaquier parte d'Asturies y del mundu, como ta poniéndolos de fechu en Madrid, Montevideo y en Moscú.La polémica por esta tema nun ye privada de los foros d'Asturies.com. Ayeri, el portal gallegu Vieiros, na so edición Eo-Navia espublizaba esta noticia na qu'echaba pa contra l'Academia por esta decisión. L'artículu del portal gallegu, en que se fai de menos el trabayu de l'Academia nestos años, inclúi erros bultables -desmentíos lluego- como que na pasada manifestación del Día de les Lletres convocada pola Xunta pola Defensa de la Llingua Asturiana s'espulsare de la marcha cívica a la xente de l'asociación eonaviega Xeira, que vieno a la mesma con una pancarta na que se pidía "Oficialidá pras duas llinguas d'Asturias". Yera la primer vez que Xeira venía a esta manifestación, y la so pancarta yera toa una declaración d'intenciones y de posicionamientu énte la realidá llingüística local, con un testu que nun dexa sitiu pa la dulda. Pa Xeira la variante llingüística del Navia-Eo ye otra llingua, tamién asturiana, y la so normativa nun tendría de tar aprosimada a la gallega como propón la MDGA, sinon a la que propón esta asociación, basada en criterios de la fala local. El casu ye que la polémica ta servida, pero de cualquier manera, Asturies.com, que tuvo presente na manifestación, pue certificar que la presencia de Xeira na manifestación del otru vienres acoyose con bon aquel por parte del restu de los manifestantes y qu'en nengún momentu hebo problema pola so participación.

Contador Estadistiques