Polémica pola instalación d'un campu de golf en Cuideiru

La Coordinadora Ecoloxista d'Asturies emitió esta mañana un comunicáu durísimu en qu'espón la so opinión sobre'l proyectu d'una empresa norteamericana pa facer un campu de golf en Cabu Vidiu (Conceyu Cuideiru)

L'agrupación conservacionista considera que la propuesta de facer un campu de golf de 18 furacos acompañáu d'una actuación urbanística supón, amás d'un ataque al mediu ambiente, una tresgresión evidente de la normativa llegal esistente acusando al Principáu de facer papel moyao de la so propia llexislación si decide da-y el preste al proyectu

Los ecoloxistes acusen al Conseyeru de Mediu Ambiente y Ordenación del Territoriu y al Alcalde de Cuideiru de desconocer que'l Cabu Vidiu entra dafechu nel Paisaxe Protexíu de la Costa Occidental, según diz el Plan d'Ordenación de los Recursos Naturales del Principáu d'Asturies (PORNA), una figura de rangu estatal que ta penriba de cualquier disposición ambiental autonómica. El mesmu PORNA fala del altu valor ambiental d'esta parte de la costa y reconoz l'impactu paisaxísticu "irreversible" que produciría nelli "una proliferación de les víes de penetración".

El mesmu testu diz que "el valor paisaxísticu del área veríase emporcao pola estensión de les zones urbanes fuera de los núcleos de población". Énte ello, ñlos ecoloxistes denuncien que la pretensión de dedicá-y un millón de metros a un complexu hosteleru y urbanísticu dedicáu al golf ye una barbaridá. Según la Coordinadora Ecoloxista, el proyectu valta tamién la Normativa Urbanística en vigor. A falta de que se dea de pasu l'aprobación del Plan d'Ordenación del Litoral (POLA) que ta acabante de pasar el periodu d'esposición pública, la norma actual diz que'l "suelu non urbanizable de costa" solo da permisu "usos agrícoles y forestales que nun comporten edificación".

La Coordinadora sorraya que parte del terrén en que tendría de facese'l campu de golf son dafechu llugares que l'Alministración del Principado de Asturias tien propuestos énte la UE como posibles "Llugares d'Importancia Comunitaria" dientro de la rede Natura 2000. Los ecoloxistes amenacen con denunciar al Principáu énte la Unión Europea por esti particular en casu de permitir el campu de golf