Polémica na Comarca de la Sidra pol asturianu

El PSOE de la Comarca de la Sidra
(mancomunidá qu’agrupa los conceyos de Nava, Villaviciosa,
Sariegu, Cabranes y Bimenes) dixo esta selmana que pa dientro de poco va
presentar unes normes pa regular l’usu del asturianu nos órganos
que dependan d’esta mancomunidá. Según dixo Alejandro Vega, van presentar un documentu asemeyáu
al qu’aprobó hai dellos meses el Conceyu de Nava y que depués
impugnó la Delegación del Gobiernu. Nesti sen, Vega dixo que nun
faen más que desenvolver la Llei d’Usu y dar la posibilidá
de desbloquiar l’asuntu de les ordenances de Nava, que seríen
recurríes polos órganos de la Mancomunidá, cosa que
l’equipu de Gobiernu navetu nun fixo por tar l’Alcalde Xulián
Fernández prisioneru de los sos pautos col PP. El PSOE llegó tamién a dicir, pela boca del so representante,
que les ordenances que s’aprobaron apocayá en Villaviciosa son
“mui bien meyorables” y tal paez que tán feches pa llava-yos
la cara a dalgunos, nuna clara referencia a los asturianistes. Vega aprovechó pa dicir que’l PSOE ye pioneru na
promoción del asturianu na comarca y qu'esto “ta na llinia de lo
que yá entamaron ellos va unos años”. Con estes normes los
ciudadanos de la Comarca de la Sidra van poder rellacionase nes dos
llingües cola alministración de la mesma y va facese propaganda y
promoción turística billingüe. Pela so parte, los asturianistes, que gobiernen en Nava y tienen un conceyal
en Villaviciosa, calificaron les declaraciones del representante del PSOE de
“cinismu y ambigüedᔠcalculada, viniendo d’un
partíu que ye “la mayor lacra pal asturianu”. El portavoz d’esti grupu de conceyales (que tán escindíos
del PAS), Arturo Redondo recordó-y a Vega que la Llei d’Usu
aprobóse a instancies del
PAS
na pasada lexislatura, que foi la única na que nun gobernó'l PSOE
desque hai democracia y emplazólu a que reclame p’Asturies lo mesmo
que pide pa la Comarca, al tiempu que facía repasu de les agresiones a
la nuestra llingua nos últimos meses, como’l casu de Radio Sele y
dixo que l´únicu que fai prisioneros ye’l Presidente Areces,
que metió a un mozu na cárcel por manifestase pola
arbitrariedá contra esa emisora, llegando a prindalu elli mesmu. El conceyal de Villaviciosa, Mundo Collada convidó tamién al
PSOE a facer na Alministración autonómica lo mesmo que fai
ellí, depués de sabese qu’esi partíu va presentar
tamién unes ordenances en Cabranes, que gobierna’l PP.