Polémica en Xixón por una esposición en gallegu

El Parque Arqueolóxicu y Natural de la Campa Torres tien abierta hasta'l 5 de xunu una esposición sobre'l castru de Viladonga en Lugo. L'amuesa, entitulada 'Del yacimientu al muséu' esplica toles fases dende l'afayu hasta la recuperación de los elementos patrimoniales qu'igüen esti importante castru de la provincia de Lugo. La sorpresa pal visitante ye que tolos paneles de l'amuesa tan en gallegu cola so correspondiente traducción al castellanu que'l visitante asturianu ha consultar nun cartafueyu aparte.

La presentación de los conteníos de la esposición na llingua de la comunidá vecina llevantó la crítica del PP de Xixón. El portavoz del partíu nel conceyu Manuel Pecharromán condenó que los conteníos de la muestra tean en gallegu esclusivamente cuando amás "l'ayuntamientu rechaza l'asturianu" y qu'amás ente los materiales orixinales de la muestra gallega se presenten ferramientes y preseos de los arqueólogos que trabayen nos yacimientos de Xixón col sellu del conceyu. Pa más aquello, xunta los paneles en gallego, que'l conceyu defende porque "nun supunxeron coste nengún" pásase un vídeo sobre los afayos arqueolóxicos de Veranes que, nel día en que Pecharromán foi a visitar la esposición, proyectábase cola voz matada.