Polémicu entamu del congresu del Partíu Comunista d'Asturies

El Partíu Comunista d'Asturies (PCA) entama güei vienres en Xixón el so VIII congresu, que pue resultar polémicu enforma. Ello ye que la Comisión Executiva del PCE decidió declarar nulu esti congresu en cuantes que nelli "nun se daben les garantíes democrátiques mínimes" tres de detectar delles irregularidaes nel procesu precongresual. El sector críticu a la directiva del PCA, encabezada pola diputada Noemí Martín, ye minoritariu n'Asturies y tien el so guañu más fuerte n'agrupación d'Uviéu, pero ye mayoritariu nel Partíu Comunista d'España, que dirixe Francisco Frutos. El congresu, por de pronto, sigue alantre y Noemí Martín asegura que la Comisión Executiva del PCE nun tien poder p'anular un congresu

La tensión ente les families del PCA yá rinchare va poques selmanes a cuenta de la polémica pola construcción del Centru Cultural Niemeyer, pero'l cruce d'acusaciones intensificóse nos últimos díes, y asina mientres Francisco Asís, dirixente del sector críticu acusó a la dirección del partíu n'Asturies de "rebeldía" a los mandaos del comité federal, Noemí Martín asegura que'l congresu va llevase alantre con toles garantíes y dixo en referencia al sector críticu que "pretende consiguir con atayos lo que nun ye a consiguir democráticamente".