Polémica pola conservación de la playa l’Espartal

La playa del Espartal, en Conceyu Castrillón, ta en trámite pa declarase Monumentu Natural d'Asturies. Mientres el mesmu Conceyu de Castrillón alegó contra la declaración y pide que l'espaciu protexíu mengüe, dende'l Colectivu Ecoloxista d'Avilés defenden que la declaración ta redactada en términos probetayos y esixen que la declaración como monumentu natural s'espurra hasta protexer tamién Raíces.

El mesmu Plan d'Ordenación de los Recursos Naturales d'Asturies califica l'Espartal como lo último que queda d'un sistema de dunes de sable que foi perdiéndose dende los años 50 por culpa de la presión de la industria y la urbanización. La construcción nos años 70 de les grandes torres d'apartamentos de Salinas, que se metieron lliteralmente peles sableres, dañó enforma esti espaciu nel qu'agora tamién existe la voluntá d'entamar otra urbanización que-yos abulta una agresión dañible enforma a los ecoloxistes avilesinos, que tamién llamenten que sía'l del Espartal l'últimu espaciu natural de les sos característiques que vaya recibir la declaración como monumentu natural.

El Colectivu ecoloxista Avilesín califica de "llamentable" el que sía'l mesmu Conceyu de Castrillón el qu'agora que s'entama'l procesu pa la declaración como espaciu protexíu del Espartal sía quien-y pida al Gobiernu asturianu que s'encurtie la faza protexida, una solicitú que pa los ecoloxistes demuestra que'l conceyu "quier más sacar perres de la urbanización qu'esfrutar los beneficios de la conservación". Contra ello, los ecoloxistes píden-y al Gobiernu asturianu que s'enanche la banda de protección hasta llegar al Ríu Raíces pa qu'asina se venceyen dos espacios de gran interés que yá faen un sistema conxuntu de manera natural. El colectivu demanda tamién qu'entren en zona de protección les dos balses de jarosita de la empresa AZSA p'asina poder restaurar nel futuru los terrenos que tomen. Ente les midíes complementaries que se proponen dende'l CEA, ta tamién la idega del urbanista Ramón Fernández Rañada, que propunxo nel añu 1994 que la carretera de San Xuan de Nieva a Salinas se llevare más pal sur pa nun francer la unidá de les sableres.