Polémica pol cargu de Procurador Xeneral d’Asturies

El cargu de Procurador Xeneral d'Asturies, equivalente asturianu al Defensor del Pueblu, ta criando abonda rocea ente los socios de gobiernu asturianos. Dempués de que'l vienres se conociere que la candidata que propón la FSA-PSOE pal cargu nun ye otra que la conceyala socialista por Xixón María Antonia Fernández Felgueroso, a la que podría amestase como axuntu al popular Noel Zapico, la coalición Izquierda Xunida espresó al traviés del so secretariu xeneral Jesús Iglesias el nun tar conforme con qu'esti cargu, que propunxere precisamente IX la so creación, vaya ocupalu una persona que nun ye independiente no tocante a militancies polítiques.

Ello ye que'l cargu de Procurador Xeneral precisa del preste de los trés quintos de la Xunta Xeneral, un númberu de diputaos al que nun lleguen les fuerces de gobiernu d'Asturies. L'alcuerdu que, en consecuencia, s'aldovina qu'amagostaron ente PP y PSOE p'pautar los puestos dientro d'esti cargu nuevu enraxonó a la directiva d'IX, y dempués de que'l conseyeru Javier Valledor declarare que se trataba d'un "fechu grave" el secretariu xeneral d'IX d'Asturies Jesús Iglesias afondó na tema afirmando que'l nomamientu negociáu col PP de la hermana de l'alcaldesa de Xixón "abre un mecanismu perversu na Xunta Xeneral" albidrando a resultes d'ello un últimu añu de llexislatura "con tensiones mui difíciles".

Opina sobre esti asuntu en Conceyu Abiertu