Polémica ente Gobiernu asturianu y Uviéu pol Muséu Niemeyer

El gobiernu asturianu, el conceyu d'Avilés y la Sociedá Estatal de Participaciones Industriales, SEPI, dieron anuncia de que diben entamar acciones llegales tres de les declaraciones de la conceyala uvieina Isabel Pérez Espinosa, que venceyó esti vienres el proyectu del Centru Cultural "Oscar Niemeyer" n'Avilés con un supuestu "pelotazu urbanísticu" amagostáu poles trés entidaes.

La conseyera Ana Rosa Migoya, portavoz oficial del executivu asturianu salió contra les declaraciones de la conceyala uvieina con un comunicáu en que refuga les "calumnies" d'esta y da anuncia de la posibilidá d'entamar pleitu por elles. Isabel Pérez Espinosa definiere la construcción del Centru Niemeyer n'Avilés como "el mayor escándalu" de los últimos años n'Asturies, comparándolu col del "petromochu" de 1993 y esplicando que'l proyectu avilesín - pol que postulaba Uviéu- yera la sida pa la construcción na oriella derecha de la Ría d'Avilés de viviendes y centros comerciales, úniques razones que taríen tres del treslláu del equipamientu p'Avilés en cuenta de facelu n'Uviéu, según Espinosa.

Ana Rosa Migoya asegura que'l Centru Cultural yá se conseñaba en PXOU avilesín y diz que "atacar el centru ye atacar les decisiones democrátiques del Conceyu d'Avilés, declarando que les palabres d'Espinosa van dir a manes de los servicios xurídicos del Principáu pa estudiar si hai posible delitu nelles.

Opina sobre esti tema en Conceyu Abiertu