Podemos y IX ponen l’exemplu del PP de Galicia y el gallegu pa desacreitar a Mercedes Fernández

Emilió León, voceru de Podemos, considera que la líder popular Mercedes Fernández “nun s’atrevería” a dicir sobre’l gallegu en Galicia “les coses que diz equí sobre l’asturianu”. Mentes, Gaspar Llamazares reprocha-y que’l Partido Popular (PP) defenda nel país vecín “lo que niega a la ciudadanía n’Asturies”.

Estes acusaciones a Fernández feches ayeri poles dos formaciones d’izquierda lleguen pola llegada del fin de plazu pa presentar aportaciones al borrador del dictame de la Comisión Especial d’Estudiu sobre'l Réxime de Proteición y Promoción del Asturianu. León, amás de censurar los ataques continuos de la popular al idioma, apuntó que la presidenta del partíu n’Asturies utiliza esta táutica pa tapecer la corrupción del so partíu tanto en Madrid con “la Gürtel” como n’Uviéu “con Caunedo”.

Mentes, el voceru d’IX, refugó l’intentu d’asitiar l’alderique sobre la cooficialidá del asturianu fuera del contestu nacional, lo que considera una campaña pa “contaminar” cola cuestión catalana los derechos de la ciudadanía asturiano. En referencia concreta a Fernández, apuntó que “esiste un derechu de los falantes, qu’esiste en Galicia igual que n’Asturies. Resulta llamativo que pal PP el derechu de los falantes de Galicia sía superior al derechu d’Asturies”, destacó.

Al empar, Fernández siguió cola so campaña contra l’idioma llegando a afirmar que los partidarios a la oficialidá “son cuatro, anque escriban muncho”, y a dicir que con ella baxaría la matriculación na universidá. Inclusive tornó a facer referencia al fechu de que dalgunos políticos favoratibles a la llingua asturiana nacieren fuera d’Asturies, casu de Llamazares, como si tuvieren esta posición por ser desconocedores de lo qu’ella califica asturianu en contraposición al “artificial”, esto ye’l, normativu.

La FSA nun adelanta les sos aportaciones al borrador

Marcelino Marcos Líndez, voceru del grupu parllamentariu socialista, afirmó que la postura de la FSA cola oficialidá ye bien conocida y que les sos aportaciones al borrador del dictame van conocese nos díes próximos. Nicanor García Fernández, de Ciudadanos, caltuvo la mesma opinión qu’adelantó en rueda de prensa’l vienres, y Cristina Coto, de Foro, calificó l’alderique abiertu pol PP como “interesáu” y perxudicial pal idioma.D’igual forma, confirmó la posición del so partíu de favorecer la oficialidá cuando haya consesu políticu pa ellu, refugando’l modelu vascu o catalán.

Na semeya: Portada de la web billingüe del PP gallegu.