Podemos y IX algamen un alcuerdu eleutoral pal 26-X

El pasu definitivu va ser el preste de les bases de dambes formaciones, consulta que va celebrase ente esti martes y el miércoles. Alberto Garzón, candidatu a la presidencia de la coalición, va ocupar el númberu 5 de la llista por Madrid. Gaspar Llamazares sigue oponiéndose a esti alcuerdu.

Pablo Iglesias y Garzón, los líderes de dambes formaciones, sellaben ayeri l'alcuerdu con un abrazu na madrilana Puerta del Sol difundíu nun videu peles redes sociales. L'oxetivu ye "ganar les eleiciones al PP", según espresaron nun comunicáu emitíu na tarde d'ayeri.

Les negociaciones lleváronles alantre los secretarios d'organización Pablo Echenique y Adolfo Barrena, que roblaron un pautu de mínimos con autonomía de votu. Una de les duldes yera les posiciones de salida de les llistes, con un pesu mayor pa los candidatos de Podemos. Asina, Garzón va ocupar el númberu 5 de la llista por Madrid.

D'igual forma, l'alcuerdu, que van votar ente güei y mañana les bases de dambes formaciones, afita que la campaña eleutoral va facese per separtao, con dalgunos actos conxuntos. Otra manera, EQUO sumaráse tamién a esta coalición.

Situación n'Asturies

Esti pautu eleutoral ente Podemos y IX atopa della resistencia n'Asturies, onde Llamazares sigue amosando les sos dicrepancies col mesmu. Les rellaciones ente dambes formaciones n'Asturies nun son bones, con crítiques continues mientres la llexislatura nacional pol apoyu d'IX a la FSA-PSOE y munchos enfrentamientos na Xunta Xeneral que llegaron inclusive a les redes sociales.

Daniel Ripa, secretariu xeneral de Podemos Asturies, reconoció que l'alcuerdu n'Asturies "nun foi fácil" y refirióse a Llamazares diciendo que "nun entendió" el momentu actual, que califica de "histórico". Sicasí, apuntó qu'otros dirixentes de la coalición nel país sí que supieron entender la situación.

Por contra, Llamazares ta utilizando la so cuenta en Twitter p'amosar les sos discrepancies col alcuerdu.