Podemos ufre'l so sofitu a Alonso pa que la especialidá docente nun tea en riesgu

El cambiu de postura del Ministeriu d'Educación, Cultura y Deporte sobre la creación de la especialidá de Llingua Asturiana y Gallego-asturiano lleva a Podemos a anunciar el so sofitu al conseyeru Alonso nesti procesu. "Ye una midida fundamental pa la conservación y la sobrevivencia de la llingua asturiana", afirma.

"Queremos tender la mano al conseyeru Genaro Alonso, que tras les sos declaraciones a dellos medios de comunicación manifestó la so voluntá de consiguir apoyos nos grupos parlamentarios de la Xunta Xeneral, cola intención de sacar alantre la Especialidá docente del profesoráu de Llingua Asturiana y Lliteratura", apunten dende Podemos, formación qu'espera "nun tar viviendo un capítulu nuevu de la historia asocedida na llexislatura pasada, onde les dos alministraciones pasaren, la una a la otra, la responsabilidá d’una inxusticia histórica como ye la de nun tener reconocida esa especialidá".

"Lo que nun puede volver a pasar ye que, por culpa de xuegos políticos de salón, pueda ponese en riesgu la conservación y promoción de la llingua asturiana y el gallego-asturiano", añaden pa depués "animar al señor conseyeru a qu’entaíne a la hora de ellaborar un Decretu del Gobiernu autonómicu col que se ponga en marcha la especialidá, col oxetivu fundamental de garantizar la estabilidá del profesoráu y, al empar, que valga pa contribuyir na meyora de la calidá de la enseñanza en cuantes a l’asignatura".

Pa ello, el Gobiernu "va tener como sociu lleal y desinteresáu collaborador al grupu parllamentariu de Podemos Asturies. Amás, tamién va tenenos al pie a la hora de consiguir tantos apoyos sociales, como políticos, sían necesarios pa respaladalos na puesta en marcha d’esi decretu".