Podemos ufre’l so programa eleutoral n’asturianu

La llingua asturiana apaez ente les opciones pa consultar el programa del partíu que tien a Sofía Castañón como cabezalera pal 20-A n’Asturies. Nél inclúi la resolución del conflictu col Gobiernu estatal polos fondos mineros adeudaos al país.

L’ampliu programa cuenta con 394 puntos, siendo’l primeru’l dedicáu al ‘Plan Nacional de Transición Enerxética’ que presenta la formación de Pablo Iglesias. Nel terrén llingüísticu destaca la qu’espresa’l ‘Derechu a una enseñanza vehiculada nes llingües cooficiales’ (139). Nesti puntu Podemos asegura que “vamos garantizar l’accesu al aprendizaxe nes llingües cooficiales en cualquier territoriu del Estáu, con centros específicos y de la promoción de los intercambios escolares ente comunidaes autónomes. Y va fomentase la identidá cultural col conocimientu de la contorna y la interculturalidá, con un currículu adaptáu a la llingua y cultura de cada territoriu del Estáu español”.

No que respeuta’l modelu territorial, apuesta por un ‘Alcuerdu pola financiación territorial’ (54) “nel marcu d’una reforma constitucional que reconoza la dimensión plurinacional del nuestru Estáu”. Nesi sen señala que “vamos entamar un procesu d’evaluación de los sistemes de financiación de les comunidaes autónomes, cola finalidá de promover un consensu sobre les reformes necesaries pa qu’ameyore la so eficacia en cuantes al cumplimientu efectivu de los principios d’autonomía, solidaridá interterritorial y llealtá institucional, nel marcu d’una Facienda federal. Vamos revisar tamién la financiación de les faciendes locales y provinciales p’asegurar la so capacidá d’atención a les necesidaes de la ciudadanía”.

Sobre el ‘Derechu a decidir’ (277) señala que “vamos abrir un ampliu debate ciudadanu sobre’l reconocimientu y les formes d’exerciciu del derechu a decidir nel marcu del debate acerca del cambiu constitucional. Vamos reconocer constitucionalmente la naturaleza plurinacional d’España, como tamién vamos asegurar el derechu de los gobiernos autonómicos a celebrar consultes a la ciudadanía sobre l’encaxe territorial del país”. Asina, caltién la so apuesta pola “convocatoria d’un referéndum con garantíes en Cataluña pa que los sos ciudadanos puedan decidir el tipu de rellación territorial que quieran afitar col restu d’España”.

Puntu concretu pa los fondos mineros

No que respeuta a los intereses asturianos, Podemos inclúi la demanda de ‘Fondos mineros pal desarrollu d’Asturies’ (350). “Vamos impulsar la resolución del conflictu ente alministraciones pol pagu de les cantidaes adeudaes de fondos mineros, y vamos aplicar estos fondos a polítiques económiques espansives que permitan destinar eses cuantíes a proyectos qu’ameyoren el fortalecimientu de les pymes asturianes, l’emplegu sostenible y los servicios públicos esenciales como la sanidá, la educación, la vivienda y los servicios sociales”, afirma’l programa, que tamién se pue consultar en castellanu, catalán, eusquera, gallegu y inglés.