Podemos ufre diálogu a la FSA de cara a los Presupuestos del 2023 “si Adrián Barbón decide mirar a la izquierda”

“Asturies necesita unes cuentes propies, fuertes, progresistes, xustes y redistributives”, apuntó Sofía Fernández Castañón, coordinadora autonómica de Podemos, qu’ufre diálogu a la FSA pa negociar los Presupuestos del 2023 “si Barbón decide mirar a la izquierda”. Demanda “polítiques valientes en defensa de lo público”.

“Los Presupuestos son la nuesa oportunidá d’amosar qué queremos ser y quienes somos yá”, considera la xixonesa, que tamién demanda “fortaleza y dignidá a la hora de lluchar les tresferencies estatales y execución”. “Ye’l momentu d’apostar por polítiques útiles pa la ciudadanía y midíes progresistes y valientes d’afondamientu democráticu, de redistribución de la riqueza y defensa a muerte de los servicios públicos, n’especial de los educativos, sanitarios y sociosanitarios”, aseguró, frente a les voces que reclamen “recorte y, por estensión, cobardía” en momentos de crisis.

“El complexu momentu que travesamos tien que servinos pa entender que la ciudadanía necesita política que sía útil y que les cuentes del añu que vien va marcar ensin dulda esi camín y de forma clave cuál va ser la orientación de la salida d’esta suma de crisis que llevamos. Podemos facelo recortando y con floxura, o apostando polo público, por blindar derechos, por que paguen más lo que más tienen y pola garantía llexislativa de meyores en tolos ámbitos de la vida de la xente. Según el camín qu’escueya Adrián Barbón, contará con nosotres o tendrános enfrente”, añadió.

El Plenu del Día d’Asturies, l’Alderique d’Orientación Política Xeneral y los Presupuestos del 2023 “van marcar con claridá la verdera voluntá de diálogu cola izquierda del Gobiernu d’Asturies, la verdaderá voluntá d’aprobar unos Presupuestos progresistes y tresformadores, o si va reafirmar el Gobiernu d’Asturies esi camín hacia la derechización que vien faciendo a lo llargo de la llexislatura”, siguió Rafael Palacios, voceru parllamentariu, que criticó que “nun hebo cambios fundamentales nestos trés años, nengún fechu relevante sacáu alantre”.

“Nin hebo reforma del Estatutu nin aprobamos lleis estructurales y fundamentales como podríen ser una Llei de Vivienda tan necesaria o la Llei LGTBI; siguimos enfadando a los conceyos y a los defensores del mediu ambiente n’Asturies con una Llei de Calidá Ambiental cuestionada dende tolos ámbitos y dende tolos espacios; negocióse y aprobóse una Llei de Midíes Alministratives xunto cola derecha que causó un dañu mui grande… Podía siguir y siguir con too lo que se fixo mal y con too aquello que se dexó de facer. El Gobiernu d’Asturies tien una gran oportunidá de cambiar el rumbu coles cuentes del 2023”, rescampló.