El Barómetru de xineru del CIS sitúa a Podemos y les sos confluencies en Galicia, Catalunya y la Comunitat Valenciana como principal partíu de la oposición, superando al PSOE. Los resultaos nunes eleiciones anticipaes seríen asemeyaos a los del 20-A.
El Partido Popular (PP) sería la fuercia más votada según esti estudiu con un 28,8 por cientu del total, tres la cocina fecha pol Centru d'Investigaciones Sociolóxiques (CIS). Podemos algamaría un 13,2 por cientu, pero sumando les plataformes entamaes en Galicia, Catalunya y la Comunitat Valenciana llegaría al 21,9 por cientu, superando asina al PSOE, que quedaría con un 20,5.
En comparanza colos datos del 20 d'avientu, el PP xubiría una décima (28,7 por cientu nes eleiciones), Podemos poco más d'un puntu (20,7 por cientu) y el PSOE baxaría ún y mediu (22 por cientu). D'esta forma, una convocatoria anticipada d'eleiciones nel casu de que los partíos nun lleguen a un alcuerdu pa formar gobiernu dexaría una situación mui asemeyada a l'actual.
Ciudadanos y UP tamién se caltienen
El restu de fuercies tamién algamaría unos resultaos mui similares. Ciudadanos rexistra un 13,3 por cientu n'intención de votu (13,9 por cientu'l 20-A) y Unidad Popular (UP) un mesmu 3,7 por cientu. ERC sería la siguiente fuercia más votada, con un 2,8 por cientu (2,4).
Hai que destacar que la encuesta del CIS fíxose ente'l 2 y el 11 de xineru, 13 díes depués de les eleiciones y enantes del entamu de les negociaciones pa la formación de gobiernu.
Adxuntu | Tamañu |
---|---|
![]() | 264.74 KB |