Podemos reclama abrir "yá" l'alderique pa la reforma del Estatutu pa declarar la oficialidá

"Ye una obligación democrática a la que tenemos que dar respuesta", aseguró Palacios con motivu del Día de la Llingua Materna.

"Dende Podemos Asturies defendemos que l'asturianu y el gallego-asturiano, como llingües propies d'Asturies, tienen que tener, xunto col castellanu, el calter de llingües oficiales. Tenemos que garantizar el derechu a conoceles y a usales; nenguna persona n'Asturies debería ser discriminada pola llingua que llibremente escueya pa comunicase. Polo tanto, reclamamos que na Xunta Xeneral s'abra yá'l debate pa la reforma del Estatutu d'Automía d'Asturies col envís de declarar la oficialidá", tresmitió'l diputáu pasáu 21 de febreru.

Rafael Palacios destacó la importancia esencial de "tresmitir y preservar los conocimientos y les culturas tradicionales d'una manera sostenible dende la preservación y el cuidáu de toles llingües" coincidiendo col 21 de febreru, Día Internacional de la Llingua Materna, lo que "va fomentar lo tolerancia y el respetu a los demás". Nesi, el diputáu esplicó que Podemos quier “una Asturies abierta, tolerante, inclusiva, plural y qu'amplíe derechos”.

"Nun se trata d'imponer, sinón d'escuchar a la sociedá asturiana que ta reclamando que naide nun sía discrimináu pola manera de falar, sía en castellanu, asturianu o gallego-asturianu", especificó enantes de recordar que les formaciones favoratibles a esta postura son mayoría na Xunta Xeneral. "Amosóse que la llucha pola oficialidá ye una llucha democrática que reclama llibertaes y derechos que tán recoyíos nel artículu 3 de la Constitución española”, añadió.