Podemos llama a “sentase nuna mesa” pa pautar un calendariu con midíes “pa garantizar los derechos llingüísticos”

“Hai midíes concretes, cencielles, que nos permitiríen dar pasos pa evitar la desapaición de la llingua asturiana”, asegura Emilio León, voceru de Podemos. La formación morada llama a fuercies polítiques y axente sociales a “sentase nuna mesa” pa pautar un calendariu con midíes “pa garantizar los derechos llingüísticos”.

La intención de Podemos ye la de “alcontranos toos, al marxe de les diferencies de partida, al marxe de cómo foren les posiciones hasta’l momentu, dexando de llau tolos reproches habíos y por haber, pa sentase nuna mesa pa falar cuál ye’l calendariu pa garantizar a los asturianos y asturianes los mesmos derechos que se pueden disfrutar n’otres comunidaes onde’l Partido Socialista y Partido Popular nun ponen torga nenguna”, aseguró León nuna rueda de prensa celebrada ayeri na que tuvo acompañáu por Lluis Miguel Orviz, responsable de Polítiques Llingüístiques de la formación morada. “Dende llueu, Podemos Asturies nun va pasar a la historia por ser la fuercia que nun fixo tolo posible pa salvar la llingua de los asturianos y les asturianes”, calcó.

“Queremos abrir esti foru de debate pa falar y ver si queremos salvar el nuesu idioma. Pa ello ye inevitable qu’empecemos a tomanos en serio la política llingüística, que pa ser efeutiva tien que ser con midíes de consensu”, apuntó Orviz, que recordó la importante perda de falantes que tamos viviendo “década tres década”.

Decretu d’especialidá dende Asturies

Podemos anunció tamién la presentación esti mes na Xunta Xeneral d’una proposición non de llei pa la creación dende Asturies de la especialidá docente de Llingua Asturiana y Gallego-asturiano, agora paralizada pola falta d’entendimientu ente’l ministeriu y conseyería, al traviés d’un decretu. “Esta propuesta ye una bona oportunidá pa que’l Partido Socialista y el PP demuestren la so bona voluntá en solucionar el problema. Ta dientro de les competencies autonómiques equipar la enseñanza del asturianu a cualquier otru, y encima ye una midida a coste cero, por eso dicimos que ye la prueba d’algodón de la so voluntá política de poner fin a esta problemática”, apuntó León, qu’añadió que’l siguiente pasu sería la inclusión por parte del Gobiernu estatal de la especialidá d’asturianu nel catálogu d’especialidaes docentes.

Por último, Orviz destacó que Podemos va crear un Manual d’Usu Internu de la llingua asturiana, a piques yá de terminase.

Na semeya, León y Orviz. Autor: Iván G. Fernández.