Podemos esixe al Gobiernu “el máximu rigor éticu y ambiental na instalación de parques eólicos”

|
Aeroxenerador

“Ha respetase de forma estricta la zonificación y les esclusiones afitaes nel decretu 42/2008 del 15 de mayu de Directrices Sectoriales de Ordenación del Territoriu pal Aprovechamientu de la Enerxía Eólica nel Principáu d’Asturies”, reclama Podemos al Gobiernu. Ésti impide la instalación de parques eóliques en zones d’altu valor ambiental.

Podemos refuga “cualquier modificación” del mesmu “que pueda facer menos ríxida la zonificación y esclusiones establecíes naquel momentu”, demandando al Gobiernu el “máximu rigor éticu y ambiental na instalación de parques eólicos”. L’anuncia por parte del Executivu de la revisión de la normativa nun procesu de participación pública llevantó sospeches ente sectores ecoloxistes al respeuto y el conseyeru d’Industria, Emplegu y Promoción Económica, Enrique Fernández Rodríguez, tuvo que confirmar en delles ocasiones que nun se van levantar molinos n’allugamientos protexíos.

La formación morada nun sofita moratories “como la decretada a partir del añu 2009 y posteriores y que tanto daño y retrasu produxo na nuestra incorporación al escenariu de transición enerxética” p’algamar “la neutralidad climática en el año 2.050”, pero esixe que se tenga en cuenta “una serie de requisitos nes diferentes fases que garanticen la planificación territorial y enerxética dende los poderes públicos y non dende los oligopolios enerxéticos y les sos puertes xiratories, la evaluación afayadiza de los impautos ambientales y la execución correuta de les obres y midíes correutores”.

Tamién reclama que l’aceptación social del proyeutu sía un trámite d’obligáu cumplimientu, “con encuestes y sondeos representativos en tolos coleutivos afeutaos, vecinos cercanos y usuarios de la zona d’instalación del parque eólicu”; la puesta en marcha de polítiques que favorezar l’emplegu femenín nun sector con “una desproporción de 1:3 respeuto al masculín”; y la esploración d’otros espacios pa la colocación de molinos o otres enerxíes renovables “que supongan el menor impautu ambiental posible, independientemente de los intereses de les grandes compañíes solicitantes”.

Contador Estadistiques