Podemos entruga al Gobiernu estatal pol incumplimientu de la toponimia por parte de Renfe nes estaciones

Renfe-Feve ta procediendo a la renovación de los cartelos de señalización de les estaciones del país ensin respetar la toponimia oficial, esto ye, l’asturiana, según denuncia Podemos. El diputáu por Asturies Segundo González García tresmitió una entruga al Gobiernu estatal sobre esta situación.

Según espresa l’escritu presentáu énte la Mesa del Congresu de los Diputaos esti llunes, “Renfe Feve ta faciendo una renovación de los cartelos de señalización del nome de los llugares nes sos estaciones n’Asturies ensin respetar la toponimia tradicional asturiana”. Asina, y basándose no qu’afita la Llei d’Usu y Promoción del Bable/Asturianu y el Decretu 98/2002 qu’establez el procedimientu de recuperación de la toponimia asturiana, llanza dos entrugues al Gobiernu.

La primera plantegada por González García refierse a si “¿tienen el Ministeriu de Fomentu o ADIF conocimientu d’esta situación?”, pa depués continuar con si ¿”van realizar dalguna aición pa que se respete la toponimia tradicional asturiana na renovación de los cartelos de les estaciones de Renfe Feve?”.