Podemos demanda la realización inmediata d’un estudiu sociollingüísticu

Presenta una proposición non de llei sobre l’adopción de midíes pa la proteición, conservación, difusión y normalización del idioma que va tratase próximamente en Plenu. Tamién entrugues sobre los deportes tradicionales y el patrimoniu.

Podemos Asturies insta al Conseyu de Gobiernu a que presente énte la Xunta Xeneral un proyeutu de Reglamentu pa desendolcar y facer cumplir la Llei del Promoción y Usu del Bable/Asturianu y la realización inmediata d’un estudiu sociollingüísticu "que nos aporte les claves de  les actitúes, creencies, espectatives y vitalidá de la llingua asturiana ente la población" pa detectar "les posibilidaes y les reticencies esistentes nesti ámbitu partiendo d’unes bases bien establecíes".

L’anterior, encargáu pola Academia de la Llingua Asturiana, llevó’l nome de ‘II Estudio sociolingüístico de Asturias 2002’ y el so autor foi Franscisco José Llera Ramo, responsable tamién del primeru, fechu por demanda del Gobiernu nel 1991 y espublizáu nel 1994 col títulu ‘Los asturianos y la lengua asturiana. Estudio sociolingüístico para el Principado de Asturias’.

La intención de Podemos ye que, una vegada finada esti tercer estudiu sociollingüísticu y analizáu’l mesmu, l’Executivu "ellabore y implante con caráuter urxente’l II Plan pa la Normalización Social del Asturianu, tres el primeru que se desendolcó ente los años 2005-2007". 

Tamién demanda que s’inste a toles corporaciones municipales a cumplir la Llei d’Usu y a la modificación de los currículos del primer y segundu ciclu d’Educación Infantil "col propósitu de recoyer la realidá sociollingüística del Principáu d’Asturies y regular l’enseñu de la llingua asturiana y el gallego-asturiano en dicha etapa educativa".

Esta proposición non de llei va aldericase probablemente la selmana qu'entra en Plenu na Xunta Xeneral, previstu pal xueves y vienres.

Cuatro entrugues

Lucía Montejo, vocera del grupu parllamentariu, tamién presentó nel rexistru cuatro entrugues sobre la política xeneral del Gobiernu que van tratase en sesiones próximes. La primera refierse a los deportes tradicionales, en concreto sobre les midíes previstes a adoptar pa la so proteición, conservación y difusión. Mentes, les restantes céntrense na proteición del patrimoniu industrial y l’inmaterial, asina como del prerrománicu.