Podemos demanda a Sánchez 30 cuestiones pendientes, ente elles la creación de la especialidá docente

Daniel Ripa y Jara Cosculluela acudieron a la Delegación del Gobiernu estatal n’Asturies pa rexistrar el documentu ’30 demandas al nuevo Gobierno’ de Pedro Sánchez. Ente elles ta’l desaniciu del peaxe del Güerna, el desarrollu de la rede de cercaníes, dotación pal Prerrománicu o la creación de la especialidá docente d’asturianu.

‘30 demandas al nuevo Gobierno. Asturies merece un cambio’ “son una serie de deberes pendientes col nuesu territoriu que tien Pedro Sánchez dende’l minutu ún de pisar La Moncloa”, espresa la covocera d’Organización de Podemos Asturies, que critica’l “inmovilismu” que vive’l país y del qu’acusa tanto al PP como al PSOE. El secretariu xeneral de la formación añade que los asturianos y asturianes “tán yá fartes de promeses y abandonos por parte d’unos y d’otros. Cuando tán na oposición faen promeses qu’incumplen sistemáticamente cuando lleguen al Gobiernu”.

El documentu, que contién midíes tanto pal ámbitu llocal como pal nacional, recueye 30 cuestiones pendientes cola so respeutiva esplicación. La primer d’elles ye la supresión del peaxe del Güerna pal 2021 porque “daña la economía d’Asturies”, asegura Ripa.

Podemos tamién considera una prioridá el finalizar les obres de la variante de Payares y de l’Autovía A-63 (Uviéu-La Espina), la devolución de los terrenos de l’antigua fábrica de La Vega a Uviéu, el Plan de Vías de Xixón y cumplir colos compromisos coles cuenques mineres. Al respeuto, céntrase nos 213 millones de euros de los fondos mineros pendientes y nos 250 millones en compromisos adquiríos de “los que nun se sabe nada”.

La modificación del Real Decretu 1594/2011, de 4 de Payares, y el Real Decretu 1834/2008, de 8 de Payares “pa que se reconozan n’Educación Primaria y Secundaria les especialidaes docentes de les llingües propies d’aquelles comunidaes que, anque nun tengan reconocíes diches llingües como oficiales, dispongan de proteición llegal y manifiesten la so voluntá de desarrollales” ye otra de les demandes de Podemos al Executivu socialista nuevu, cuestión que taba bloquiada pol PP dende’l Ministeriu d’Educación y Cultura. La dotación de perres pal Prerrománicu, el desarrollu de la rede de cercaníes, la ellaboración y execución d’un Plan de Patrimoniu Industrial Asturianu, y l’Autopista del Mar son dalgunes de les otres cuestiones recoyíes nel documentu.