Podemos defende la escolarización en proximidá como vía única p'afitar la vida nel mediu rural

"Si les families nun disponen d'ella, la vida nel mediu rural ye imposible", señala.

Podemos Asturies amuesa asina la so disconformidá col Plan Especial de Desarrollu Socioeconómicu del Suroccidente, que inclúi 29 midíes y más de 170 aiciones coles que'l Gobiernu pretende rexenerar económicamente la zona. "Paeznos una broma de mal gustu que finxan esmolecimientu pola decadencia poblacional del suroccidente, ofreciendo un 'plan' con más solombres que claros, mientres espulsen a les families con fíos por nun ser quienes a comprometese col caltenimientu del enseñu nel mediu rural, onde cumple un papel fundamental de sostén demográficu. Ye cenciellu: si les families nun disponen d'escolarización en proximidá, la vida nel campu nun ye posible", afirmen dende la formación morada.

Nesi sen, califique de "humillante" que nesti altor del añu "les familias de Degaña desconozan si contarán con tresporte a Cangas del Narcea pal alumnáu de Bachiller, o si les más de cien familias de toda Asturies que residen fuera de las rutes del Consorciu contarán con beques que cubran dignamente los costos de desplazamiento dende los sos llares", poniendo l'exemplu del casu de los padres de Busecu, "que siguen ensin saber si esti cursu podrán siguir llevando a sos fíos al CRA al que pertenecen".

"Poro, creemos que nun fai falta un 'plan del suroccidente' pa defender y reforciar un pilar maestru como ye la educación pública. Sicasí, el Gobiernu del PSOE paez inorarlo, yá que les deficiencias estructurales na mayoría de los CRAs, el pieslle d'aules y la situación de precariedá y asfixa de los sos profesores tán poniendo en grave riesgu la educación nos conceyos menos favorecíos xeográficamente", añade.