Podemos critica la "doble cara" de la FSA énte la proteición de los productos asturianos

"Los socialistes siguen aplicando unas polítiques incongruentes: n'Asturies falen de proteiciones y n'Europa de lliberalizaciones", afirmen dende la formación morada.

"Paeznos mui lloable y necesaria l'anunciada y esperada marca de 'los productos del paraíso' de la que nestos díes falaba'l presidente Javier Fernández. Sicasí, produznos una gran inquietú la enorme contradicción colos sos homónimos n'Europa, que traten de zarra de forma inminente l'alcuerdu con Canadá, el CETA, y siguen apostando por firmar el TTIP ente EE XX y la XE, un alcuerdu que nun respetará les nueses DOP nin les nueses IGP, yá que nun tán nel llistau propuestu por España pa caltener ciertes denominaciones españoles d'orixe protexíes énte los trataos de llbre comerciu", espliquen.

La diputada Paula Valero entrugaba hai un mes a la conseyera de Desarrollo Rural y Recursos Naturales, María Jesús Álvarez, por esta situación, cola respuesta de la socialista de que les alvertencies de Podemos yeren "espantaxos". "Entrugámonos si la conseyera esmolezse pol futuru de les nueses industries, de los nuesos ganaderos y ganaderes, énte la contradicción coles polítiques europees socialistes al respeuto", apunten dende la organización, qu'advierte de la intención de grandes multinacionales como Coca-Cola Española d'entrar nel sector llacteu, coles consecuencies que tendría pa los productores asturianos.

Consumu responsable

"Énte un despoblamiento irreversible del campu asturianu, la entrada de productos de consumu habitual como la lleche o la carne de xatu fechu n'otros países a baxos precios, pondrá'l puntu final a la ganadería asturiana y, en consecuencia, supondrá'l fin del mundu rural como hasta agora lo conocemos", avisen. Por ello, recomienden concienciar a la población nel consumu responsable "que ponga na mente y nel corazón de los y les consumidores asturianes el compromisu necesariu cola pervivencia de la nuesa cada vez más escasa xente del campu".

Podemos teme que, de nun tomar midíes, en pocos años desapaezan los productos del país, o que sían ellaboraos por grandes marcas y identificaos como de la nuesa tierra ensin selo, énte la falta de compromisu de PP y PSOE n'Europa pola so proteición; y énte les incongruentes polítiques socialistes, que n'Asturies falen de proteiciones y n'Europa de lliberalizaciones. Javier Fernández o la conseyera de Desarrollu Rural deben esplicar esti xuegu de doble cara que lleva la política socialista énte les proteiciones a los productos asturianos".