Podemos critica a la FSA por nun apoyar una declaración institucional na Xunta sobre la llingua materna y los socialistes acúsenlos de mentir

Una declaración institucional sobre la llingua materna provocó un crucie d'acusaciones ente Podemos y la FSA. Los primeros criticaron que los segundos –xunto col PP y Ciudadanos– decidieran nun sofitala mentes que los socialistes aseguren que la formación morada miente "p'acaparar protagonismu mediáticu".

“Chócanos que’l PSOE, que va poco asumió la oficialidá del asturianu y del gallego-asturiano como un compromisu eleutoral, refugara la mentada declaración al traviés del so grupu nel Parllamentu asturianu”, espresó Podemos. “Queda fuera de toda dulda’l compromisu del grupu socialista colos oxetivos que la UNESCO señala al conmemorar el Día de la Llingua Materna: les llingües llocales tresmiten cultura, valores y conocimientu”, retruca la FSA.

La historia comenzó cola presentación del grupu parllamentariu de Podemos una propuesta de declaración institucional al restu de fuercies polítiques de la Xunta Xeneral con motivu de la conmemoración, la selmana pasada, del Día Internacional de la Llingua Materna, que se celebra’l 21 de febreru. Según espliquen, “el testu propuestu resaltaba que toles llingües del mundu son patrimoniu de los pueblos y comunidaes que les empleguen como elementu de comunicación y d’interrellación, pero tamién patrimoniu de la humanidá nel so conxuntu, pola so aportación a la diversidá y a la bayura cultural de la raza humana”.

Amás,  afitaba “que n’Asturies hailos que se reconocen nel castellanu como idioma maternu y los que lo faen nel asturianu o nel gallego-asturiano, y qu’unos y otros merecen respetu y igualdá de derechos, polo que se defendía un escenariu xurídicu estatutariu nuevu, axustáu a esa realidá y que garantice una convivencia con armonía y normalidá ente les distintes manifestaciones llingüístiques”. “Nun defende otra cosa que la igualdá de derechos ente asturianes y asturianos, yá seyan falantes d’una llingua o d’otra”, añaden dende Podemos sobre una propuesta que tuvo’l refugu de la FSA, PP y Ciudadanos.

“Supuestu refugu”

Nun tardó en llegar la respuesta los socialistes, que llamentaron l’engañu, la vulgaridá y la impostura que exhibe’l grupu Podemos Asturies al atribuyir al nuesu grupu parllamentariu’l supuesto refugu a apoyar un testu, presentáu inicialmente pol voceru del citáu grupu como borrador cola intención de que se convirtiera en Declaración Institucional en rellación a la celebración del Día Internacional de la Llingua Materna”. Darréu critica’l so proceder, col que “evidencia un desconocimientu absolutu de los mecanismos parllamentarios, pese a que los sos diputaos tán a piques de cumplir cuatro años nos sos escaños, y tamién la desllealtá del so voceru”, Enrique Lopez Hernandez.

“El grupu parllamentariu socialista nun se negó en momentu nengún a soscribir una declaración institucional con motivu de la conmemoración del Día Internacional de la Llingua Materna; asina se-y comunicó al voceru proponente. Lo que sí se-y pidió ye que treslladase’l so borrador al restu de grupos parllamentarios cola fin d’algamar un consensu. Eso ye lo que siempre se busca na Xunta Xeneral del Principáu, anque Podemos paez desconocelo. Cuando’l grupo socialista nun ta d’alcuerdu con un documentu dizlo con claridá y nun s’anda con escuses. Tampoco precisamos que Podemos nos interprete”, defendiéronse énte una postura, la de Podemos, cola qu’entienden busca “acaparar dalgo de protagonismu mediáticu”.