Podemos considera que lo que quier l'Executivu cola "factura na solombra" ye culpabilizar a la ciudadanía

La factura simulada pa los usuarios del sistema sanitariu tampoco nun convez a Podemos, que considera que’l Gobiernu quier culpabilizar con ella a la ciudadana cola escusa de la tresparencia. La formación morada cree más prioritario la espublización de les llistes d’espera y l’aumentu del personal n’Atención Primaria.

El voceru Emilio León critica que l’Executivu, tres refugar  les midíes d’aforru en gastu sanitariu y les conclusiones del dictame de la comisión d’investigación de les llistes d’espera, pretenda “dar una leición de civismu a les asturianes y asturianos culpabilizándolos pol gastu sanitariu eleváu al traviés de la presentación de factures individualizaes, como si nun supiesen yá lo que cuesta pagar impuestos o llegar a final de mes”. Asina, echa en cara a los socialistes que quieran defender una tresparencia supuesta “con una factura na solombra, como si’l restu de los datos de la conseyería tuviesen baxo lluz y taquígrafos”.

Pal diputáu resulta esmoleciente que dicha factura, más qu’una ferramienta pa “recordanos lo muncho que costó defender la sanidá universal, sía l’abonu pa discursos que llexitimen el copagu sanitariu”, recordando cómo’l Gobiernu “caltién el copagu educativu en 0 a 3”. “Estes propuestes nun surden cuando falamos d’infraestructures que finaron n’importantes sobrecostos qu’agora tán siendo investigaos pola Guardia Civil”, añade León, que s’entruga si el gastu pa trayer l’AVE a Asturies apaecerá “nos billetes futuros” o s’enviará “a casa de quienes nunca se xubieren a ún”.