Podemos celebró primaries municipales en cuatro conceyos

En Xixón, Uviéu, Avilés y Cangas del Narcea.

Mario Suárez del Fueyo resultó reelixíu como secretariu xeneral de Podemos nel conceyu más pobláu del país. Con 880 votos emitíos, el candidatu tamién de la coalición de xunidá popular Xixón Sí Puede nes eleiciones últimes recibió un total de 459 apoyos (54,77 por cientu) por 379 de la tamién conceyala Verónica Rodríguez Fernández (45,23 por cientu).

N'Uviéu llevó les primaries Daniel Rodríguez Latorre, que consiguió 376 votos (73,73 por cientu), per delantre d'Alma Angélica Fuertes, con 134 (26,27 por cientu). Nestos dos conceyos tamién se renovó'l Conseyu Ciudadanu Municipal.

Mentes, la eurodiputada Tania González Peñas ye la secretaria xeneral nueva de Podemos Avilés tres algamar un 84,72 por cientu del total de votos (183 persones), quedando David García con un 6,48 por cientu (14), José Luis Pérez con un 5,56 (12) y Carmen Aguilera con un 3,24 (7). En Cangas ganó Ángel Manuel González con un 64,29 por cientu (18), superando asina a Laura Vélez, qu'algamó un 35,71 por cientu (10).

Alta participación

Dende Podemos destaquen l'alta participación nes primaries, como vien siendo vezu en tolos procesos de votación entamaos. Asturies ye la comunidá autónoma cabezalera nesi sen dientro de la formación.