Podemos Asturies reivindica la so autonomía propia na visita d'Echenique

|
Podemos Asturies reivindica la so autonomía propia na visita d'Echenique

“N’Asturies trabayaremos pa construyir un proyeutu propiu y adaptáu al cambiu que necesitamos na nuesa tierra”, afirma Daniel Ripa. El secretariu xeneral de Podemos Asturies confirma que les propuestes aldericaes nel país tendrán el so desarrollu a nivel territorial, con independencia del resultáu de Vistalegre II.

“Hemos d’aterrizar el procesu, enrraigonalu nel territoriu, desarrollando de forma simultánea y complementaria un ‘Vista a Asturies’ col que podamos calzanos los escarpinos pa recuperar el nuesu futuru” asegura Ripa, qu’añade que “dende Asturies sentímonos obligaos a aportar les nueses meyores idees a Madrid, pero también hemos de garantizar un proyeutu propiu, congruente cola realidá política asturiana, que s’adapte a les nueses carauterístiques xeográfiques, demográfiques, sociales y económiques, y que potencie la rede de candidatures municipalistes poles qu’apostamos”. El dirixente de Podemos Asturies fixo estes declaraciones ayeri énte la visita del secretariu d’Organización de Podemos, Pablo Echenique, a Mieres pa participar nuna reunión del Conseyu Ciudadanu y un alcuentro colos simpatizantes col oxetivu de conocer de primer mano los plantegamientos asturianos de cara al procesu d’alderique organizativu pa preparar la II Asamblea Ciudada Estatal que va celebrase en Madrid del 10 al 12 de febreru, conocida popularmente como Vistalegre II.

Ripa comunicó formalmente a Echenique la necesidá de contar con dellos recursos operativos que doten d’autonomía a la organización n’Asturies pa desendolcar la so actividá cola máxima efectividá y tresparencia nel país. Ente otres cuestiones práutiques, destacó que “sería interesante disponer d’un censu y sistema de votación, que permita facer consultes sobre decisiones polítiques n’Asturies, como ye’l casu de los presupuestos”.

Contador Estadistiques