Podemos Asturies estructura’l Conseyu Ciudadanu en diez estayes de trabayu

Daniel Ripa y los 34 integrantes del Conseyu Ciudadanu de Podemos Asturies celebraron esti martes el primer conceyu de trabayu tres les primaries ganaes pola corriente Somos Asturies. Esti muérganu de la formación estructúrase en diez árees de trabayu diferentes.

La primer d’elles lleva’l nome de ‘Voces de Asturies’, compuesta por Lucía Montejo, Emilio León, Néstor Fernández y Paco Álvarez, encárgase del argumentariu políticu y social, diseñu de campañes y medios de comunicación. ‘Movilización institucional’, dinamizada por Nora Isabel Espina, Kike López, Antón Díaz y Pelayo García, céntrase na intervención institucional “municipal, autonómica, estatal y europea’, mentes que ‘Asturies 2030’ mira al futuru a partir de “l’Asturies que ñaz” de la mano de Noelia Martínez, Elena Herrera y Manolo Carrero.

La cuarta estaya de trabayu ye ‘Ágora Asturies’, que va tratar la soberanía financiera, l’autoxestión llegal, la organización territorial, les migraciones, xéneru y igualdá, y los derechos llingüísticos, área na que trabayen Jara Cosculluela, Inés González, Nacho González y Lluismi Orviz. De la ‘Democracia audiovisual y digital’, ferramientes web, diseñu y participación dixital, encárguense Cristina Blanco y Orlando Fernández, mentes que María Hernández y José Ángel Gayol faen lo propio nel área ‘Auditoría de la democracia’, centrada na investigación de la corrupción, los derechos y les llibertaes, y l’auditoría de la deuda.

Del ‘Rescate ciudadano’, área centrada nel tema de les privatizaciones y los recortes d’emplegu y servicios públicos, derechos sociales, Educación, Sanidá, vivienda, servicios sociales y garantía de renta, son responsables Mar García, Rosa Espiño, Ana Isabel Esteban, Andrés Ron y Pindy Díaz. Pela so parte, Xune Elipe ta, xunto con Laura Tuero y Silvia Cosio, na estaya ‘Cultura, innovación social, comunicación comunitaria, deporte y patrimonio’.

Completen la estructura del Conseyu Ciudadanu ‘Equilibrio territorial y medioambiental. Mundo rural’ y ‘Más allá de la Asturies de cartón piedra’, destinada a tratar la economía, los derechos llaborales, la xeneración d’emplegu, sostenibilidá, cuidaos, ciudadanía y bon vivir. Los conseyeros que dinamícenles son Beatriz González, Paula Valero y David González, na primer estaya, y Fini Rodríguez, Lorena Gil, Pablo Martínez Testa y Fernando de Dios, na segunda.