Podemos Asturies celebra'l Día d'Asturies cola so Folixa Popular

El Solarón de Xixón ye l'escenariu escoyíu pa celebrar "un 8 de setiembre festivu, laicu y republicanu".  Mario Suárez, voceru municipal de Xixón Sí Puede, apuntó que "el Día d’Asturies ye una xornada de reivindicación, de llucha, d'esfrute y de folixa". 

Un nuevu escenariu, nel centru de Xixón, y una ufierta ampliada d'actividaes, con una duración que pasa d'una a dos xornaes, son les principales novedaes de la Folixa Popular de celebración del Día d’Asturies que Podemos Asturies organiza pal vienres y el sábadu próximos nel Parque Tren de la Llibertá, conocíu popularmente como El Solarón. Laura Tuero, responsable de Participación de Podemos Asturies y coordinadora d'esti eventu, destacó esta mañana, na rueda de prensa de presentación llevada a cabu n'Uviéu, "qu'esti añu la Folixa vien con munches sorpreses. Axuntaremos pa celebrar la festividá de la nuesa tierra, pa faer repasada de la situación política actual y pa cargar la mochila d'idees y d'enerxía con vistes al nuevu cursu qu'empieza y que va ser más importante, si cabo, que los anteriores".

Recordó que la Folixa Popular "echó a andar en 2015, xusto dempués de la entrada nes instituciones de Podemos Asturies y de les candidatures nos conceyos, y llega yá a la so cuarta edición. Caltenemos la esencia y l'espíritu de les cites anteriores, pero con dos novedaes importantes: per un sitiu, estrenamos allugamientu nel centru de Xixón y, por otru, ampliamos notablemente la ufierta y la variedá de conteníos, que pretendemos que seyan pa tolos gustos, edaes y sensibilidaes. Y esti añu vamos cuntar con una Pre Folixa, que va tener llugar el vienres, nel mesmu escenariu". Tou eso, destacó, col propósitu de celebrar "un 8 de setiembre festivu, laicu y republicanu".

Pela so parte, Mario Suárez, voceru municipal de Xixón Sí Puede, apuntó que "el Día d’Asturies ye una xornada de reivindicación, de llucha, d'esfrute y de folixa. Esos trés aspeutos lleámoslos xunindo estos cuatro años. Los dos motivos pa faelo n'El Solarón son treslladar la celebración al centru de la ciudá y que El Solarón ye la imaxe y l'idea política de lo que lleva pasando en Xixón dende va munchos años. Echóse abaxo una estación de trenes pa faer otra nueva y dende va dieciséis años sigue na mesma situación. El Plan de Víes nun sal alantre, la estación intermodal ta en diseñu puramente y el metrotrén ye un túnel que ta anubiertu y posiblemente nel futuru inmediatu vase empezar a desbloquiar y saniar". Resaltó tamién que na Folixa va ponese l'acentu "nes esencies de la cultura y de la tradición de Asturies, venceyáu a la defensa de la llingua y a la necesidá de que nel Parlamentu asturianu encétese la oficialidá nel marcu del mayor consensu posible". Concluyó diciendo que "esta Folixa marca l'entamu d'esti cursu y de la ofensiva de Podemos en Asturies, en Xixón y nos distintos conceyos pa ganar ciudaes del cambéu y pa ganar Asturies".

Jara Cosculluela, responsable de Feminismos y coportavoz d'Organización de Podemos Asturies, manifestó que "tenemos la voluntá absoluta de qu'ésta seya una fiesta pa tolos asturianos y asturianes, y una fiesta familiar. Per otru llau, anguaño consolídase daqué fundamental, que ye la presencia de la cultura asturiana. Y paeznos tamién fundamental otru apueste concretu, que ye la de la feminización de la Folixa, cola presencia de muyeres de primera llínea". Destacó, coles mesmes, que «vamos tener el nuesu propiu puntu violeta por que nun haya agresiones y que seya una Folixa pa toles persones comenenciudes en participar".

A lo llargo del vienres y del sábadu va haber actividaes baltes como un desfile canín impulsáu por entidaes protectores d'animales, talleres de circu, de estimulación musical pa neñes y neños, de baille tradicional, de iniciación al fútbol o de globoflexia, cuentacuentos, concursos de postres caseros y d'escanciáu, feria del llibru y del discu, de productos ecolóxicos y d'artesanía, amás d'una variada ufierta musical, con conciertos y actuaciones que van dende Dixebra hasta'l cantautor Jerónimo Granda, pasando pela Banda de Gaites Villa de Xixón y la formación madrilana Terrible Jauría, ente otros.

Ente les invitaes y convidaos van tar Íñigo Errejón, diputáu de Unidos Podemos; Noelia Vera, coportavoz de Podemos; Martine Billard, voceru de Francia Insumisa; Xulio Ferreiro, alcalde d'A Coruña; Robeca Quintans, autora de ‘Juan Carlos I. La biografía ensin silencios’ y Nuria Alabao, coautora del volume ‘Un feminismu del 99%’. La presencia asturiana nes meses redondes y otres actividaes va correr al cargu de Lorena Gil, Ana Taboada, Tania González, Mario Suárez, Nuria Rodríguez, Jara Cosculluela, Yolanda Huergo, Enrique del Tesu, David Rivas, Alicia Álvarez y Leti Baselgas, ente otres persones.