Podemos Aragón refuga la oficialidá del aragonés y del catalán por nun falase “na mayor parte del territoriu” y apuesta pola so proteición

El secretariu xeneral de Podemos Aragón y candidatu a les Cortes aragoneses, Pablo Echenique, refugó nuna entrevista n’Antena 3 la oficialidá del aragonés y el catalán al nun falase “na mayor parte del territoriu”, y apostó por defender la so proteición. N’Asturies, Podemos recibe critiques por facer coincidir un mítin eleutoral d'Íñigo Errejón cola manifestación de la XDLA y l’actu académicu del Día de les Lletres Asturianes.

Echenique atendió a Susanna Griso, conductora del programa ‘Espejo Público’ que s’emite n’horariu matutín, sobre dellos temes d’actualidá del so partíu, dexando pal final una entruga sobre una propuesta ciudadana que pidía la oficialidá del aragonés y el catalán, y que la direición de Podemos Aragón refugó. “Nós lo que dicimos ye que’l Gobiernu d’Aragón ye’l que menos gasta na proteición de les sos llingües propies en toda España. Aragón gasta dos céntimos d’euru por persona y añu mentes qu’Asturies, que ye la penúltima comunidá que menos gasta, gasta ochenta veces más”, esplicó la cabeza visible de Podemos nel país, qu’afirmó que’l “Gobiernu d’Aragón abandonó a los falantes de llingües propies y nós vamos protexer esi patrimoniu y esi derechu”. Sicasí, descartó la oficialidá “del aragonés y del catalán” porque “nun tien sentíu nengún que se plantegue una cooficialidá cuando na mayor parte del territoriu nun se falen llingües propies”.

Estes declaraciones nun sentaron bien a los coleutivos de defensa de los idiomes llariegos d’Aragón, como Esfendemos as Lenguas, qu’entiende qu’Echenique tien “una falta de visión histórica sobre la situación d’estes llingües minoritaries propies d’Aragón y que la oficialidá ye un símbolu llegal al que nun se pue arrenunciar”.

Un mítin nel Día de les Lletres Asturianes

La visita d’Errejón, númberu dos de Podemos a nivel estatal, a Xixón pa participar esti vienres nun mítin n’El Náutico ta llevantando muncha polémica peles redes sociales. L’eventu ta convocáu pa les 19 hores, lo que va facelu coincidir colos programaos por mor del Día de les Lletres Asturianes n’Uviéu. A les 19.30 hores va salir de la Estación del Norte la yá llamentablemente tradicional manifestación ‘L’asturianu, llingua oficial’ qu’entama la Xunta pola Defensa de la Llingua Asturiana (XDLA), mentes que l’Academia de la Llingua Asturiana celebra a les 20.30 hores nel Teatru Campoamor el so actu institucional.

Son munches les critiques a Podemos Asturies por esta decisión de facer coincidir el mitín d’Errejón, que va tar acompañáu pol candidatu Emilio León, colos actos del XXXVI Día de les Lletres Asturianes. Según argumentaciones de dellos miembros de la formación, la razón de celebralu nesta xornada ye la intención de facer una demostración de fuercia frente al PSOE, qu’a la mesma hora en Ciares celebra un mitín cola presencia del so secretariu xeneral Pedro Sánchez. Xune Elipe, miembru del Conseyu Ciudadanu de Podemos Asturies, anunció la so asistencia a la manifestación de la XDLA.