Podemos afala a los diputaos de la FSA a votar ‘Non’ a Rajoy

El Congresu refugó esti xueves la investidura de Mariano Rajoy colos votos en contra del PSOE, dexando la mesma pal sábadu, na que los socialistes van astenese tres la decisión del Comité Federal. Podemos afala a los diputaos de la FSA a votar “en conciencia” y resistir “al chantaxe de Susana Díaz y Javier Fernández”.

Segundo González García, parllamentariu por Asturies de Podemos nel Congresu, pidió a Adriana Lastra y Antonio Trevín “que sían valientes” y que “voten en conciencia y digan ‘non’ a Rajoy esti sábadu”. Recordó que les polítique de Rajoy foron “mui males” pal Estáu, pero sobre manera “nefastes” p’Asturies, “una comunidad paralizada por, per un llau, los recortes del Partido Popular, y pel otru, pol ritmu perezosu del Gobiernu de Javier Fernández”.

La LOMCE, el rescate de les entidaes financieres, la reforma llaboral, la desapaición de los incentivos a les enerxíes renovables o los pieslles de los centros d’investigación son dalgunos de los puntos que señaló González García pa xustificar esta postura, “ensin escaecer la quiebra inminente de la hucha de les pensiones”. Por ello afala a los dos representantes de la FSA en Madrid a que “nun participen del chantaxe al que-yos tán sometiendo tanto Javier Fernández como Susana Díaz, col apoyu de Felipe González”, yá qu’entiende que cola astención el PSOE “nun sólo traiciona a los sos militantes, sinón que pon en peligru al conxuntu de la sociedá”.

170 a favor; 180, en contra

La votación d’ayeri, na que Rajoy necesitaba una mayoría absoluta, finó con 170 votos a favor y 180 en contra, con nenguna astención. Amás de los apoyos del PP, el presidente del Estáu en funciones contó colos de Foro –formación cola que los populares foron en coalición n’Asturies–, UPN, Ciudadanos y Coalición Canaria-Partido Nacionalista Canario.

L’astención del PSOE na votación de mañana –prevista como mui pronto les 19.45 hores– dará’l Gobiernu a Rajoy, yá que nesta ocasión valdría una mayoría simple. Queda por ver qué postura van caltener el PSC, partidariu del ‘Non’ al popular, y de dalgunos diputaos contrarios a la posición afitada pol Comité Federal socialista, ente los que ta Pedro Sánchez. Precisamente Lastra yera una de les persones que sofitaba la postura del ex secretariu xeneral del partíu.