Podemos acusa de prevaricación a Educación y Cultura

Afirma que camudó'l procedimientu p'axudicar la realización de los informes toponímicos de trés conceyos.

Lucía Montejo, diputada de Podemos Asturies, apuntó ayeri na Comisión d'Educación y Cultura de la Xunta Xeneral que la Direición Xeneral de Planificación Llingüística y Normalización axudicó nel mes de payares un contratu a Ideas y Futuro Ingeniería pa estudiar la toponimia de Cuaña, Villayón y Eilao, empresa que nun cuenta con esta actividá ente'l so oxetu social, dalgo irregular. Enantes, encargárase'l mesmu trabayu a un filólogu espertu na realización de dichos informes.

“Había dos equipos más d'especialistes trabayando en llabores de toponimia, y los trés casos viéronse envueltos nuna serie d'irregularidaes no que respeuta a plazos y formes de contratación”, añadió Montejo, qu'asegura que'al filólogu responsable afeutáu pola situación en Cuaña, Villayó y Eilao ofrecieron-y un posterior concurso públicu. "Esto ye yá de por sí un escándalu absolutu, porque de confirmase los fechos, taríemos falando d'un casu nuevu de prevaricación na Conseyería d'Educación y Cultura”, denunció.

Podemos Asturies esixe que se clarifiquen los motivos pa cambiar los criterios de contratación una vegada que'l procesu yá taba en marcha y que se paralice de forma cautelar l'axudicación a dicha empresa. Pela so parte, el conseyeru Genaro Alonso negó cualquier irregularidá y apuntó que, amás de la mera cuestación toponímica, les prescripciones téuniques de les contratos toponímicos inclúin "otros aspeutos de calter téunicu y topográficu como la xerarquización espacial de les entidaes de población, la xeollocalización o tamién la ortografía de les entidaes recoyíes".

Pese a lo argumentáu pol responsable d'Educación y Cultura, dende la formación morada dicen tener constancia del entamu d'una investigación interna al respeuto, "estremu al que prefirió nun responder Genaro Alonso al ser apelláu sobre ello pola diputada de Podemos Asturies", afirma la organización nuna nota.