Playes contaminaes n'Avilés

Col entamu del bon tiempu, les playes asturianes enllénense de xente turriando al sol y de bañistes. Sicasí, non toles playes del país tan en condiciones pa recibir al turismu, y asina'l colectivu ecoloxista d'Avilés ta acabante de da-yos paerte a les autoridaes del riesgu que supón l'entamu adelantáu de la campaña de baños nes playes de San Balandrán, Zeluán y L´Arañón, les trés na rodiada d'Avilés, que tien catalogación de "altamente contaminada" polo que nun ye conveniente bañase nella

Esti inviernu, la Playa del Espartal dio un claru avisu mediuambiental al atopase nella altísimes concentraciones de metales pesaos, lo que ye, pa los ecoloxistes avilesinos, una amuesa de los índices de contaminación presentes en toles playes de la redolada y que faen d'elles llugares malsanos pa bañase y hasta pa echase al sol

Énte esta situación, los ecoloxistes piden que se piellen al bañu estes playes y que les alministraciones dexen de pasase'l muertu ente elles. Ente les acciones que fexeron pa consiguir esti oxetivu, el grupu conservacionista tien mandáu avisu l'Axencia de Sanidá Ambiental y Consumu d'Asturies pa que señalice y tranque les playes industriales non susceptibles al bañu. Esta mesma solicitú llevóse énte'l Serviciu de Control Alimentariu y Atención al Mediu, el conceyu d'Avilés, y a l'Autoridá Portuaria d'Avilés y Dirección Rexonal de Mediu Natural del Principáu en cuantes que propietaries de les playes