Ponse en marcha un plan pa controlar l'aviespa asiática

|

La Conseyería d'Agroganadería y Recursos Autóctonos punxo en marcha un plan pa detectar y controlar l'aviespa asiática. Esti branu viéronse siete exemplares en San Tiso d'Abres.

La intención d'esti plan ye actuar enantes de la instalación de ñeros d'esta especie nel país, más agresiva que l'autóctona y un peligru pa les colmenes de la zona. L'aviespa asiática, orixinaria de China, llegó a Europa vía Francia hai diez años y hai cinco yá diera'l saltu a Euskadi. Galicia ye otra de les zones más afeutaes y nel conceyu de San Tiso d'Abres, que fai de llende ente los dos países, yá pudieron vese hasta siete exemplares n'agostu. Por ello, el Gobiernu decidió desarrollar una estratexa de prevención nel que participen delles conseyeríes y otres alministraciones, amás de la Guardería de Mediu Natural, la Direición Xeneral de Ganadería, el Serviciu d'Emerxencies del Principáu d'Asturies (SEPA), los servicios de Estinción d'Incendios y Salvamentu d'Uviéu y Xixón nos sos respeutivos ámbitos municipales, el Servicio de Protección de la Naturaleza de la Guardia Civil (SEPRONA) y les agrupaciones municipales de Proteición Civil.

La primer fase del plan ye d'alerta, pa detectar exemplares o aviesperos mediante la vixilancia pasiva o con trampes, mentes que la segunda trátase d'intervención pa la retirada y desaniciu de ñeros en territoriu asturianu.

Contador Estadistiques