La Coordinadora Ecoloxista d'Asturies califica de “timu” el plan de meyora del aire de Xixón y Carreño presentáu pol Gobiernu

Belén Fernández, conseyera de Fomentu, Ordenación del Territoriu y Mediu Ambiente, presentó’l martes na Feria Internacional de Muestres d’Asturies (FIDMA) el plan de meyora del aire de Xixón y Carreño. Pa la Coordinadora Ecoloxista d’Asturies trátase d’un “timu”.

“El Gobiernu d’Asturias engáñanos cola contaminación de Xixón y Carreño cuando achaca ente les sos causes al traficu y les partícules marines. La causa principal ye la contaminación industrial en más d’un 70 por cientu”, apunten los ecoloxistes tres conocer les declaraciones de Fernández. El Plan aprobáu ayeri en Conseyu de Gobiernu establez 22 llinies d’actuación a poner en marcha darréu hasta avientu del 2015, cola intención d’evaluar los sos resultaos nesi momentu. En concreto, céntrase na estación de l’avenida Arxentina, nel barriu xixonés de La Calzada, que considera como la única afeutada realmente pola contaminación de partículas en suspensión menores de diez micras (PM10).

La Coordinadora Ecoloxista d’Asturies nun ve veraces estos datos, yá que “hai otres estaciones que reflexen un grave problema mayor que la d’esti barriu” y que la conseyera “silencia intencionadamente”. “El pasáu añu toles estaciones de Xixón y Carreño superaron el valor de 20 µg/m3 pa partícules PM10 de menos de 10 micras, recomendáu como máximu de promedio añal pola Organización Mundial de la Salud (OMS), y delles superaron les medies añales de la norma española de valor llende, de 40 µg/m3”, señalen los ecoloxistes, que dan les cifres siguientes: 53 µg/m3 na estación de Montiana, 45 µg/m3  na de  Tremañes, 42 µg/m3 na avenida Arxentina, 32 µg/m3 na de Serín, 30 µg/m3 na de l’avenida Constitución, 30 µg/m3 na de Xove, 30 µg/m3 na de la cai Hermanos Felgueroso, y 29 µg/m3 na de l’avenida Castilla. No que respeuta a Carreño, ye de 44 µg/m3 en Tamón y de 40  µg/m3 na nomada ‘Longueras’. D’igual forma, tampoco nun se cumple el valor llende diariu de proteición a la salú establecíu pola norma española, que prevé como muncho 35 superaciones al año del valor de 50 µg/m3. Asocede lo mesmo cola contaminación por NO2 gaseosu.

“Hai que recordar que si llegamos a esti problema grave de salú ye porque’l Principáu renunció mientres décadess a esixir a les empresas el cumplimientu de las condiciones ambientales obligatories”, p’asegurar darréu que “esta señora yá lleva trés llexislatures cola responsabilidá”.

Les 22 llinies d'actuación

El Plan de Meyora de la Calidá del Aire na Aglomeración de Xixón, como se denomina de manera oficial, recueye 22 llinies d’actuación a partir de les que s’articulen delles midíes que requieren la implicación direuta de l’Alministración del Gobiernu, de los conceyos de Xixón y Carreño, de l’Autoridá Portuaria de Xixón y de les empreses de la zona afeutada pol plan, sobre manera de les grandes instalaciones industriales como Arcelor-Mittal, la térmica d’Aboño y la cementera Tudela Veguín, centrándose gran parte d’elles nel tráficu y na actividá industrial contaminante. Son les siguientes:

· Identificación de toles actividaes potencialmente contaminadores de l’atmósfera nel entornu de la zona de influencia del plan, adelantando la fecha llende establecida na llexislación estatal pa que cuenten con autorización na que s’establezan condiciones específiques pal so furrulamientu (Sectorial: Industria en xeneral).

· Ellaboración d’un documentu téunicu de referencia sobre los llabores de manipulación y almacenamientu de graneles sólidos nel puertu de Xixón (Sectorial: Instalaciones portuaries y industriales: Puertu de Xixón).

· Modelización de la contaminación por partícules PM10 na zona afeutada (Horizontal: Investigación y estudiu). 

· Execución d’un proyeutu que permita la predicción de fenómenos meteorolóxicos que dificulten la difusión de contaminantes na atmósfera (Horizontal: Investigación y estudiu).

· Establecimientu de topes a les actividaes que xeneren contaminación por partícules en suspensión cuando se produzan fenómenos meteorolóxicos que dificulten la difusión de contaminantes na atmósfera (Horizontal: Investigación y estudiu).

· Ampliación del estudiu de carauterización de partícules recoyíes na zona d’afeición que permita un análisis de la contribución de les fontes diferentes (Horizontal: Investigación y estudiu).

· Implantación d’un programa d’inspeición y vixilancia específicu de les instalaciones que desarrollen actividaes potencialmente contaminadores de l’atmósfera, nel entornu de la zona d’influencia del plan (Sectorial: Industria en xeneral).

· Ellaboración d’un estudiu de tráficu nel entornu de les estaciones onde se deteuten les superaciones de PM10 y implantación de les midíes recoyíes nel mesmu (Sectorial: Tráficu).

· Reducción de la emisión de contaminantes na ciudá de Xixón mediante’l desarrollu del so Plan de Movilidá y los sos planes d’actuación, no referente a la peatonalización de cais, fomentu de la movilidá ciclista, l’usu del vehículu compartíu, fomentu del vehículu llétricu y la meyora del tresporte publicu al traviés de la implantación de carril bus y de llinies nueves (Sectorial: Tráficu).

· Adopción de midíes pa disminuir les emisiones de partícules asociaes al tráficu de vehículos pesaos (Sectorial: Tráficu).

· Creación d’un rexistru d’emisiones non captaes de partícules dende les instalaciones d’Arcelor-Mittal en Veriña, descripción de les sos causes y adopción de les midíes necesaries pa evitar la so repetición (Sectorial: Instalaciones portuaries y industriales: Arcelor).

· Estudiu de les causes de la contaminación nes zones poblaes asitiaes alredor de les instalaciones d’Arcelor-Mittal y midíes necesaries pa la so reducción (Sectorial: Instalaciones portuaries y industriales: Arcelor).

· Actuaciones de meyora nes zonas d’acopiu y manipulación de graneles nes instalaciones d’Arcelor-Mittal, S.A., y estudiu de midíes nueves (Sectorial: Instalaciones portuaries y industriales: Arcelor).

· Ellaboración d’un estudiu sobre viabilidá y utilidá d’implantación de sistemes d’apantallamientu de tolos almacenamientos de graneles esistentes na zona portuaria d’Aboño (Sectorial: Instalaciones portuaries y industriales: Puertu de Xixón).

· Actuaciones de meyora nes zones d’acopiu y manipulación de graneles na zona portuaria d’Aboño (Sectorial: Instalaciones portuaries y industriales: Puertu de Xixón).

· Actuaciones de meyora nes zones d’acopiu y manipulación de graneles nes instalaciones de la fábrica de cementos d’Aboño, propiedá de Cementos de Tudela Veguín S.A. (Sectorial: Instalaciones portuaries y industriales: Tudela Veguín).

· Meyora de los acopios de carbón na central térmica d’Aboño, titularidá d’Hidroeléctrica del Cantábrico S.A. (Sectorial: Instalaciones portuaries y industriales: HC Térmica d’Aboño).

· Vixilancia epidemiolóxica d’enfermedaes rellacionaes cola contaminación del aire (Horizontal: Salú).

· Optimización y ampliación de la rede midida de la calidá del aire na zona d’afeición del plan (Horizontal: Tresparencia, informatives y de participación).

· Creación d’una aplicación que permita la visualización pol ciudadanu de la calidá del aire de forma fácil y intuitiva, y la so implementación na web, asina como meyorar la información a los ciudadanos de la zona afectada (Horizontal: Tresparencia, informatives y de participación).

· Difusión del ‘Plan de Meyora de la Calidá del Aire na Aglomeración de Xixón’ ente la población afeutada, a fin de consiguir la mayor participación ciudadana nel so desarrollu y consecución d’oxetivos (Horizontal: Tresparencia, informatives y de participación).

· Creación d’una comisión de coordinación y siguimiento de les actuaciones contra la contaminación (Horizontal: Tresparencia, informatives y de participación).

Na semeya, Fernández nel momentu de presentación del 'Plan de Meyora de la Calidá del Aire na Aglomeración de Xixón', en compañía de Manuel Gutiérrez, direutor xeneral de Calidá Ambiente.