Pirateen La Guerra de les galaxies

Esta selmana ye la estrena mundial de la última entrega de la saga de "La guerra de les Galaxies". Millones de seguidores en tol mundu tan naguando por ver "L'ataque de los clones" y nun tendríen mayor problema en pirateala pelos medios que fuere, asina que, depués de lo que pasó con cintes como Harry Potter, que podía descargase pela rede y que vendíen en dvd en rastru quince díes enantes de la estrena, George Lucas y la productora decidieron estremar la seguranza alredor de la película, que se rodó cásique en secreto. Sicasí, l'equipu de Lucas nun pudo evitar que daquién grabare la película nun pase priváu con una camaruca dixital y la volcare a la rede. Agora la película ya ta "clonada" y la Fox, productora de la cinta, echa les sos cuentes: un millón de persones verán la película d'equí al vienres, que ye cuando la estrenen en tol mundu. Anque daquién pensará si esto nun forma parte de la campaña de promoción…